霸戲哥之日常#140 │ 報復睇戲

皇恩浩蕩，戲院被封三個月後今日重開，市民報復式入場睇戲，戲院預售網罕有出現一片紅海奇景，都咪話唔得人驚。雖然有好多位係用作隔離之用，唔係真係全場爆，但身為戲癡，見到呢個情景多少都有啲感動同鼓舞。可惜霸戲哥今日就唔到時間入場，唔係都會同大家湊吓熱鬧，入場睇Nic Cage套《喪盡癲才》。

根據購票網嘅場次同入場人數推測，暫時估計最多人睇嘅戲係《怪獸與鄧不利多的秘密》同埋《月球隕落》，其次先到《喪盡癲才》同《死亡立方》呢啲。不過聽網友講，《月球隕落》伏味勁濃，下周走勢相信會回落，當然，應該仲有好多人為咗報復而中伏都唔計較嘅。

另一方面，院商為咗吸呢水報復客，可謂各出奇謀。有戲院嘅觀樂早場做緊$38一張飛，入去坐兩個鐘嘆冷氣都抵。另外，亦有戲院sell睇「完」戲先送爆谷，不過似控訴政府嘅防疫安排多啲囉。

霸戲哥

** 博客文章文責自負,不代表本公司立場 **

「林過雲」呢三個字，相信對香港人嚟講絕對係夢魘，對的士司機嚟講更加係瘟神，當年因為佢做少幾多支柯打。林過雲係香港開埠以嚟第一位連環殺手，先後殺死四名年輕女子，由於都係喺雨中犯案，畀傳媒起咗個朵叫「雨夜屠夫」。呢個名令當時只得幾歲嘅霸戲哥，每逢雨夜都瞓唔着，硬係凝住屠夫會找上門。

因為童年嘅恐懼，加深咗我研究林過雲嘅興趣，成日想知佢行兇時嘅心理狀況究竟係點。點解殺完人要肢解？肢完解又要影相留念？影完相又要去曬相舖度曬博拉？可惜無論我睇幾多文獻，至今都冇一個滿意嘅答案。

由陸永主持嘅J2節目《逝者代言人》，今晚呢集會講林過雲案，仲搵咗當日有份調查呢單案嘅法醫馬宣立嚟解構疑團添。

希望今晚睇完有覺好瞓啦。