博客文章
「林過雲」呢三個字，相信對香港人嚟講絕對係夢魘，對的士司機嚟講更加係瘟神，當年因為佢做少幾多支柯打。林過雲係香港開埠以嚟第一位連環殺手，先後殺死四名年輕女子，由於都係喺雨中犯案，畀傳媒起咗個朵叫「雨夜屠夫」。呢個名令當時只得幾歲嘅霸戲哥，每逢雨夜都瞓唔着，硬係凝住屠夫會找上門。
因為童年嘅恐懼，加深咗我研究林過雲嘅興趣，成日想知佢行兇時嘅心理狀況究竟係點。點解殺完人要肢解？肢完解又要影相留念？影完相又要去曬相舖度曬博拉？可惜無論我睇幾多文獻，至今都冇一個滿意嘅答案。
由陸永主持嘅J2節目《逝者代言人》，今晚呢集會講林過雲案，仲搵咗當日有份調查呢單案嘅法醫馬宣立嚟解構疑團添。
希望今晚睇完有覺好瞓啦。
霸戲哥
** 博客文章文責自負,不代表本公司立場 **
接連幾個沉重單元，今集《OPPA》以惡搞韓星嚟緩和一下。講述超級宅女@roxannetong 湯洛雯鍾情韓星@arnoldkwokk 郭子豪，就算對方受負面新聞影響都不離不棄，仲將郭子豪嘅1:1人型紙板拎番屋企「供奉」，後來紙板居然變真人……
靚湯演超級宅女真係豁晒出去，嗰種對住OPPA嘅心心眼，隔住電視都feel到陣毒味。呢個角色好彩由靚湯演，如果唔係佢個靚樣同癡得勻循，隨時又畀人話歧視追星族（笑）。
追星無分男女，不過追星宅男畀人感覺總係差啲。霸戲哥最記得當年周秀娜推出人型攬枕，一班宅男粉絲唔怕記者嘅鏡頭，一擁而上購買心頭好，呢啲都係愛嘅表現，其實都無傷大雅啫。
人人某程度上都有戀物（Erotic Fetishism）情意結，只係程度上有深有淺，只要唔會喺生活上構成負面影響，都唔使太顧慮嘅。但若然好似N年前「活塞男」咁，借助公園鐵板嚟尋求快慰，就應該要接受心理治療嘞。
