博客文章
人生總會愛過一些人，無論你付出幾多，都得唔到回報。湯洛雯如是，紙板郭子豪如是。但只要自我感覺良好，就算擺明做老襯，都會今生無悔。
今集《OPPA》揭曉湯洛雯點解咁鍾意韓星郭子豪，原來佢經歷過失業同失戀，雙重打擊下曾跳河自盡。大難不死後，她意外認識到韓星郭子豪，從此踏上追星旅途，心靈得到寄托，搵番生存意義。
哪管韓星郭子豪其實係酗酒爛蒲爛滾嘅混球，湯洛雯都意無反顧咁支持，只因喺佢萬念俱灰嘅日子裏，韓星郭子豪就係佢生命嘅全部。湯洛雯明知對方唔會知道佢嘅存在，仍甘心默默付出。
同一道理，紙板郭子豪對湯洛雯亦一樣，明知自己只係一塊紙板，不能奢望對方給予一點愛，但為咗令佢開心，願意無條件作出犧牲。
《OPPA》看似惡搞無聊，但細心啲諗，佢都展現到愛嘅偉大。
霸戲哥
** 博客文章文責自負,不代表本公司立場 **
皇恩浩蕩，戲院被封三個月後今日重開，市民報復式入場睇戲，戲院預售網罕有出現一片紅海奇景，都咪話唔得人驚。雖然有好多位係用作隔離之用，唔係真係全場爆，但身為戲癡，見到呢個情景多少都有啲感動同鼓舞。可惜霸戲哥今日就唔到時間入場，唔係都會同大家湊吓熱鬧，入場睇Nic Cage套《喪盡癲才》。
根據購票網嘅場次同入場人數推測，暫時估計最多人睇嘅戲係《怪獸與鄧不利多的秘密》同埋《月球隕落》，其次先到《喪盡癲才》同《死亡立方》呢啲。不過聽網友講，《月球隕落》伏味勁濃，下周走勢相信會回落，當然，應該仲有好多人為咗報復而中伏都唔計較嘅。
另一方面，院商為咗吸呢水報復客，可謂各出奇謀。有戲院嘅觀樂早場做緊$38一張飛，入去坐兩個鐘嘆冷氣都抵。另外，亦有戲院sell睇「完」戲先送爆谷，不過似控訴政府嘅防疫安排多啲囉。
