霸戲哥之日常#142 │ See Saw先

今日無意中睇到單新聞，話Facebook專頁See See TVB已經改名做@seeseetvb See Saw 先，但因為冇人知、冇人問同冇人理，搞到畀網友笑。但原來佢哋仲rap咗首歌嚟賀改名，歌詞有句「我承認我哋係一個壞咗嘅channel，我哋決定洗心革面，重頭嚟過。」霸戲哥聽完覺得仲老尷同好笑噃。

See See TVB係TVB嘅一個專頁，發佈嘅內容係惡搞番自己嘅節目為主。當初擺明係食CCTVB嘅諧音，食得靚唔靚就見仁見智，霸戲哥就覺得呢個名好易畀人誤會同混淆，喺呢個時勢要改名都好合理，同只不過係時間嘅問題啫。

近年TVB一直畀人狙擊，都唔係咩秘密嘅事。TVB固然有好多唔爭氣嘅時候，但網民成日為反而反，又有啲講唔過嘅。講到尾，觀眾淨係想睇到啲有質素嘅節目，喺呢個時勢笑吓喊吓又一日，咪幾好。

霸戲哥

** 博客文章文責自負,不代表本公司立場 **

人生總會愛過一些人，無論你付出幾多，都得唔到回報。湯洛雯如是，紙板郭子豪如是。但只要自我感覺良好，就算擺明做老襯，都會今生無悔。

今集《OPPA》揭曉湯洛雯點解咁鍾意韓星郭子豪，原來佢經歷過失業同失戀，雙重打擊下曾跳河自盡。大難不死後，她意外認識到韓星郭子豪，從此踏上追星旅途，心靈得到寄托，搵番生存意義。

哪管韓星郭子豪其實係酗酒爛蒲爛滾嘅混球，湯洛雯都意無反顧咁支持，只因喺佢萬念俱灰嘅日子裏，韓星郭子豪就係佢生命嘅全部。湯洛雯明知對方唔會知道佢嘅存在，仍甘心默默付出。

同一道理，紙板郭子豪對湯洛雯亦一樣，明知自己只係一塊紙板，不能奢望對方給予一點愛，但為咗令佢開心，願意無條件作出犧牲。

《OPPA》看似惡搞無聊，但細心啲諗，佢都展現到愛嘅偉大。