霸戲哥之日常#144 │ 金宵手記拾伍：吃播

原來豬視妹都有睇吃播習慣，話睇人食嘢好治癒。霸戲哥完全唔理解呢個邏輯，覺得close up人哋食相唔淨止肉酸，睇得多仲有少少反胃。

所以《金宵》揀吃播做題材揀得好好，呢個單元唔使有靈異嘢，個人認為已經好驚嚇。
滿正義感嘅外賣仔丁子朗「Rock哥」上身，意外揭發吃播網紅Jessica F.疑似被非法禁錮，強迫喺鏡頭前食嘢吸客，網民又懷疑Jessica F.會用摩斯密碼發佈求救訊號。丁子朗聯同女IT人阮兒同聲稱個女失咗蹤嘅白彪深入調查，但同時又冷落咗女友伍樂怡。

呢個故仔相信係參考真實事件。美國YouTuber「Kate Yup」曾經紅極一時，佢嘅片都係吃播為主，只會露出下巴，從來未見樣。有網民懷疑佢吃播時發出求救訊號而引起外界關注，甚至有人發起#SaveKateYup運動。2019年Kate Yup冇再拍片，猶如人間蒸發，至今仍然未解開謎團。

「吃播」（Mukbang）最先由韓國、日本興起，後來歐美YouTuber跟隨，再引入到大陸。通常吃播會運用埋ASMR技術（Autonomous sensory meridian response），令人產生猶如高潮嘅愉悅快感，仲會不自覺上癮，或者解釋到點解豬視妹話好治癒。

霸戲哥覺得白彪有啲可疑，會唔會係借搵女而做一啲非法勾檔呢，下星期一自有分曉。

霸戲哥

** 博客文章文責自負,不代表本公司立場 **

人生總會愛過一些人，無論你付出幾多，都得唔到回報。湯洛雯如是，紙板郭子豪如是。但只要自我感覺良好，就算擺明做老襯，都會今生無悔。

今集《OPPA》揭曉湯洛雯點解咁鍾意韓星郭子豪，原來佢經歷過失業同失戀，雙重打擊下曾跳河自盡。大難不死後，她意外認識到韓星郭子豪，從此踏上追星旅途，心靈得到寄托，搵番生存意義。

哪管韓星郭子豪其實係酗酒爛蒲爛滾嘅混球，湯洛雯都意無反顧咁支持，只因喺佢萬念俱灰嘅日子裏，韓星郭子豪就係佢生命嘅全部。湯洛雯明知對方唔會知道佢嘅存在，仍甘心默默付出。

同一道理，紙板郭子豪對湯洛雯亦一樣，明知自己只係一塊紙板，不能奢望對方給予一點愛，但為咗令佢開心，願意無條件作出犧牲。

《OPPA》看似惡搞無聊，但細心啲諗，佢都展現到愛嘅偉大。