博客文章
好消息，第46屆香港國際電影節（HKIFF）重啟啦！HKIFF往年都係3月舉行，但因為政府要收緊社交距離措施而被迫延遲，依家疫情放緩，所以定喺8月15日至8月31日舉行，為期17日。
大會今年繼續邀請到霸戲哥偶像郭富城，擔任香港國際電影節大使，亦係佢連續第四年被委以重任，推廣世界各地嘅高質電影畀戲迷觀賞。城城嘅宣傳造型照，繼續由國際著名攝影師Wing Shya操刀，佢用藍綠雙色燈光做主色，拍出嚟電影感十足。
至於電影節主題海報，就由本地著名平面設計師陳華雄操刀，佢令年選擇咗麻雀為題材，寓意係希望同香港人一樣，為夢想翱翔天際。
完整節目將會喺7月公佈，到時霸戲哥會再提大家。
霸戲哥
** 博客文章文責自負,不代表本公司立場 **
原來豬視妹都有睇吃播習慣，話睇人食嘢好治癒。霸戲哥完全唔理解呢個邏輯，覺得close up人哋食相唔淨止肉酸，睇得多仲有少少反胃。
所以《金宵》揀吃播做題材揀得好好，呢個單元唔使有靈異嘢，個人認為已經好驚嚇。
滿正義感嘅外賣仔丁子朗「Rock哥」上身，意外揭發吃播網紅Jessica F.疑似被非法禁錮，強迫喺鏡頭前食嘢吸客，網民又懷疑Jessica F.會用摩斯密碼發佈求救訊號。丁子朗聯同女IT人阮兒同聲稱個女失咗蹤嘅白彪深入調查，但同時又冷落咗女友伍樂怡。
呢個故仔相信係參考真實事件。美國YouTuber「Kate Yup」曾經紅極一時，佢嘅片都係吃播為主，只會露出下巴，從來未見樣。有網民懷疑佢吃播時發出求救訊號而引起外界關注，甚至有人發起#SaveKateYup運動。2019年Kate Yup冇再拍片，猶如人間蒸發，至今仍然未解開謎團。
「吃播」（Mukbang）最先由韓國、日本興起，後來歐美YouTuber跟隨，再引入到大陸。通常吃播會運用埋ASMR技術（Autonomous sensory meridian response），令人產生猶如高潮嘅愉悅快感，仲會不自覺上癮，或者解釋到點解豬視妹話好治癒。
霸戲哥覺得白彪有啲可疑，會唔會係借搵女而做一啲非法勾檔呢，下星期一自有分曉。
