博客文章
黑貓，喺西人眼中係不祥之物，佢哋又會同災禍、邪靈link埋一齊，人人避之則吉。至於喺中國，黑貓命運就好唔同，古時嘅人仲認為黑貓唔止可以辟邪，仲可以招財添。
今期最hit嘅黑貓，就梗係《金宵大廈》隻神出鬼沒嘅靚寶啦！暫時未知佢係吉祥定不祥，但已知嘅係，佢係貫穿現實世界同鏡世界嘅鎖匙，絕對係掌握一眾角色命運嘅關鍵貓貓。
靚寶今次唔止穿越平行時空，仲踩埋入去元宇宙。事緣TVB授權咗畀D4Deca製作同發行以《金宵》為藍本嘅NFT，第一批登場嘅就係靚寶，由Generative Art方式隨機生成1,000枚「靚寶NFT」，當中有唔同嘅靚寶表情、服裝、道具同場景嘅元素作為配圖，已知嘅場景有金宵霓虹招牌、精神病院、連鏡世界都有。唔知有冇李施嬅出浴場景呢（心心眼）？
呢批「靚寶NFT」將會喺4月29號朝早11點，喺官方網站lanbo.io以隨機盲盒方式免費發放。先到先得，每個錢包限量認領1枚。交易轉讓時用戶需要支付Gas Fee。
霸戲哥
** 博客文章文責自負,不代表本公司立場 **
有人鍾意飛上太空探索宇宙，亦有人喜歡上山下海發掘生物，兩者性質雖有唔同，但理念都係一樣，都係為人類帶嚟多一點嘅知識，去證明我哋係高尚嘅智慧物種。
年過80嘅傳奇生物學家Bruce Means，霸戲哥讀大學時都聽過佢大名，佢最近為咗發掘新樹蛙品種，聯同一班專業登山者同探險家，深入亞馬遜森林深處，登上一個名為「平頂山」（Tepui）嘅高原，並製作咗齣紀錄片《攀登平頂山》，依家喺Disney+有得睇。
Tepui位於南美國家圭亞那（Guyana）同委內瑞拉（Venezuela）嘅邊境，因為佢係有300米高嘅懸崖，形成一個天然屏障，所以一直與世隔絕，起碼冇人類踏足。亦因為咁，呢度肯定有好多從未見過嘅生物，可以話係生物學家嘅寶庫，亦解釋到點解Bruce咁想喺有生之年，登上高原一探究竟。問題係，點樣攀上300米嘅懸崖呢？
紀錄片記載住探險隊嘅艱苦旅程，睇見Bruce一步一步咁攀山涉水，幾乎連命仔都唔要，好可能只係為佢本樹蛙名冊加多幾個items而已，但原來已經彌足珍貴。
霸戲哥真係睇到好慚愧。如果當初唔係成日走堂，或者今日已經做咗生物學家。
