博客文章
無綫同芒果TV合作嘅重頭音樂節目《聲生不息》，今晚終於登場，首集一連兩個鐘，歌手輪流唱出多首經典粵語流行曲，聽得霸戲哥同豬視妹幾過癮。節目同以往嘅音樂節目都幾大分別，無論係舞台、燈光、panel以至rundown，都做得比以前出色。不得不承認，大陸節目真係有佢哋嘅成功之處。
唔好忘記《聲生不息》其實係比賽節目。16個獻唱單位分成男子、女子組，然後各自派出一位參賽者進行PK賽。老實講啲遊戲規則太複雜，豬視妹睇咗半集都未搞清點為之贏，不過唔理啦，聽歌先係主菜。
PK賽打頭陣嘅係阿Lam林子祥同葉蒨文，一出場已經殺晒。阿Lam呢把咁獨特嘅聲線，呢代歌手真係搵唔到，要承傳都唔係咁易。首集最驚喜原來係兩位新世代歌手曾比特同炎明熹，估唔到踏足大陸舞台唔怯場不特止，仲唔比前輩輸蝕。
相信呢個節目應該會製造到幾多話題。
霸戲哥
** 博客文章文責自負,不代表本公司立場 **
有人鍾意飛上太空探索宇宙，亦有人喜歡上山下海發掘生物，兩者性質雖有唔同，但理念都係一樣，都係為人類帶嚟多一點嘅知識，去證明我哋係高尚嘅智慧物種。
年過80嘅傳奇生物學家Bruce Means，霸戲哥讀大學時都聽過佢大名，佢最近為咗發掘新樹蛙品種，聯同一班專業登山者同探險家，深入亞馬遜森林深處，登上一個名為「平頂山」（Tepui）嘅高原，並製作咗齣紀錄片《攀登平頂山》，依家喺Disney+有得睇。
Tepui位於南美國家圭亞那（Guyana）同委內瑞拉（Venezuela）嘅邊境，因為佢係有300米高嘅懸崖，形成一個天然屏障，所以一直與世隔絕，起碼冇人類踏足。亦因為咁，呢度肯定有好多從未見過嘅生物，可以話係生物學家嘅寶庫，亦解釋到點解Bruce咁想喺有生之年，登上高原一探究竟。問題係，點樣攀上300米嘅懸崖呢？
紀錄片記載住探險隊嘅艱苦旅程，睇見Bruce一步一步咁攀山涉水，幾乎連命仔都唔要，好可能只係為佢本樹蛙名冊加多幾個items而已，但原來已經彌足珍貴。
霸戲哥真係睇到好慚愧。如果當初唔係成日走堂，或者今日已經做咗生物學家。
