博客文章
無綫同ICAC聯合製作嘅《廉政行動2022》，將會喺5月1日起，一連五個星期日晚上 10點喺翡翠台播出。劇集由林超賢擔任總監製，相信一定有好多飛車同打鬥場面，保證刺激。
原來關於廉政嘅劇集，早喺1976年已經有，劇集叫《靜待的革命》，當時仲係麗的度播。霸戲哥一直都係《廉政》fans，可能現實世界太多壞人逍遙法外，但劇集就保證可以將呢班人繩之於法，都算係一種心靈上嘅安慰。
《廉政行動2022》講袁偉豪同譚俊彥係同期加入ICAC，後來一次行動令兩兄弟各走極端，譚俊彥仲劈炮唔撈，自此人間蒸發。10年後，袁偉豪已經升為總調查主任，而譚俊彥呢，唔使問梗係走咗去撈偏啦！不過唔知佢有冇苦衷呢？
霸戲哥
** 博客文章文責自負,不代表本公司立場 **
無綫同芒果TV合作嘅重頭音樂節目《聲生不息》，今晚終於登場，首集一連兩個鐘，歌手輪流唱出多首經典粵語流行曲，聽得霸戲哥同豬視妹幾過癮。節目同以往嘅音樂節目都幾大分別，無論係舞台、燈光、panel以至rundown，都做得比以前出色。不得不承認，大陸節目真係有佢哋嘅成功之處。
唔好忘記《聲生不息》其實係比賽節目。16個獻唱單位分成男子、女子組，然後各自派出一位參賽者進行PK賽。老實講啲遊戲規則太複雜，豬視妹睇咗半集都未搞清點為之贏，不過唔理啦，聽歌先係主菜。
PK賽打頭陣嘅係阿Lam林子祥同葉蒨文，一出場已經殺晒。阿Lam呢把咁獨特嘅聲線，呢代歌手真係搵唔到，要承傳都唔係咁易。首集最驚喜原來係兩位新世代歌手曾比特同炎明熹，估唔到踏足大陸舞台唔怯場不特止，仲唔比前輩輸蝕。
相信呢個節目應該會製造到幾多話題。
