博客文章
連登仔最愛嘅連詩雅 @shi_ga ，終於喺今晚單元《嫁衣》登場，扮演有愛心又蠢蠢哋嘅乖女，準備同男友拉埋天窗。
胡鴻鈞 @hubertwu 就扮裁縫，喺金宵大廈開旗袍店，自細得家人傳授技藝。四眼踏實斯斯文文嘅佢，最叻原來唔係為人度身訂造旗袍，而係設計陷害他人，以達到一己目的。故仔係老套啲，講述胡鴻鈞垂涎連詩雅美色，設計拆散對方，再喺適當時機乘虛而入，好一個變態控制狂。胡鴻鈞又扮得幾入型入格。
呢類變態狗公，sadly，霸戲哥都見識唔少，佢哋共同點係平時扮nice勁好好先生，又借頭借路親近「獵物」。佢哋嘅妒忌心同疑心都比一般人重，小小事都會觸動佢哋嘅反射神經。諗起都毛管戙。
希望下集見到連詩雅吉人天相啦。
霸戲哥
** 博客文章文責自負,不代表本公司立場 **
今集《吃播》主題圍繞兩個字——真相。人人都想要真相，但真相係，網絡世界係冇真相。真相係，人人都只會相信自己相信嘅就係真相。
網紅Jessica F.疑似被非法禁錮事件，阮兒聲稱係虛構，話其實係宣傳MIA隻新game 《Lost and Found》。相信Jessica F.被消失嘅丁子朗，梗係唔信呢個版本，為咗令件事繼續發酵，不惜自編自導自演咗條被人綁架嘅片放上網，結果連佢都不自覺成為咗捏造真相嘅人。
突然失蹤嘅伍樂怡，就話自己係去台灣散心，佢手嘅瘀傷就係跌親。霸戲哥認為一定有警轟嘅白彪，今集就冇再出現。
《吃播》結局留下好多問號：MIA係咪有重大陰謀？Jessica F.係咪真係失蹤？阮兒係咪有痛腳畀人捉住？《Lost and Found》係咪用嚟掩飾真相？白彪係咪真係離開咗香港？伍樂怡係咪都畀人非法禁錮？呢啲統統都冇答案，但就留畀觀眾自行詮釋。
霸戲哥認為呢集結局收得好靚，因為咁樣先對應得番個主題：人人都只會相信自己相信嘅就係真相。
