博客文章
因為新冠肺炎疫情，原定今年5月上映、由奇洛李維斯主演嘅《John Wick: Chapter 4》，要延遲到下年3月先上。電影嘅宣傳同呢位傳奇殺手嘅行蹤一樣神秘，直至近日喺美國舉行緊嘅CinemaCon，終於有第一張霓紅燈海報流出，見到奇洛揸住支槍對準敵人，霸戲哥嘅腎上腺素已經飆升，同時個心不自覺統計緊殺敵人數……
套戲喺上年6月開始拍攝，11月煞科，拍攝地點包括有巴黎、柏林、紐約同日本，雖然劇情到呢刻仍然保密，但上集講到John Wick決定向High Table開戰，估計今集都會圍繞呢個組織。而已知嘅新角色就有宇宙最強嘅甄子丹、真田廣之同埋澤山璃奈。
霸戲哥
** 博客文章文責自負,不代表本公司立場 **
今集《吃播》主題圍繞兩個字——真相。人人都想要真相，但真相係，網絡世界係冇真相。真相係，人人都只會相信自己相信嘅就係真相。
網紅Jessica F.疑似被非法禁錮事件，阮兒聲稱係虛構，話其實係宣傳MIA隻新game 《Lost and Found》。相信Jessica F.被消失嘅丁子朗，梗係唔信呢個版本，為咗令件事繼續發酵，不惜自編自導自演咗條被人綁架嘅片放上網，結果連佢都不自覺成為咗捏造真相嘅人。
突然失蹤嘅伍樂怡，就話自己係去台灣散心，佢手嘅瘀傷就係跌親。霸戲哥認為一定有警轟嘅白彪，今集就冇再出現。
《吃播》結局留下好多問號：MIA係咪有重大陰謀？Jessica F.係咪真係失蹤？阮兒係咪有痛腳畀人捉住？《Lost and Found》係咪用嚟掩飾真相？白彪係咪真係離開咗香港？伍樂怡係咪都畀人非法禁錮？呢啲統統都冇答案，但就留畀觀眾自行詮釋。
霸戲哥認為呢集結局收得好靚，因為咁樣先對應得番個主題：人人都只會相信自己相信嘅就係真相。
