霸戲哥之日常#157 │ 秋官效應

相信喺金魚缸搵食嘅一眾股佬，都冇得唔信邪，無綫深宵時段重播鄭少秋套《天地男兒》，撻着咗「秋官效應」（aka Adam Effect），恒指早兩日已跌穿20000點，連翻車魚「mola mola」都浮埋上水，預先應驗股壇所講嘅「五窮六絕」。

豬視妹唔好股票，股市跌成點冇乜所謂，但重播《天地男兒》喎，雙眼即時發晒光。套劇展示咗咩叫真正嘅星光熠熠，你睇佢晒冷影相都可以排幾行：男嘅有鮑方、關海山、秋官、潘志文、羅嘉良、李子雄、古天樂、張智霖，女嘅有陳松伶、張可頤、伍詠薇、白茵、夏萍，呢個卡士依家真係好難再見到。

噚晚第一集，一開場睇住秋官喺灣仔捉犯跑十幾條街，已經壓得住場。依家你想封街拍戲都難啦，同埋邊度有咁多臨時演員吖。套劇有成65集，睇嚟霸戲哥同豬視妹又要推遲個生理時鐘嘞。

霸戲哥

** 博客文章文責自負,不代表本公司立場 **

連登仔最愛嘅連詩雅 @shi_ga ，終於喺今晚單元《嫁衣》登場，扮演有愛心又蠢蠢哋嘅乖女，準備同男友拉埋天窗。

胡鴻鈞 @hubertwu 就扮裁縫，喺金宵大廈開旗袍店，自細得家人傳授技藝。四眼踏實斯斯文文嘅佢，最叻原來唔係為人度身訂造旗袍，而係設計陷害他人，以達到一己目的。故仔係老套啲，講述胡鴻鈞垂涎連詩雅美色，設計拆散對方，再喺適當時機乘虛而入，好一個變態控制狂。胡鴻鈞又扮得幾入型入格。

呢類變態狗公，sadly，霸戲哥都見識唔少，佢哋共同點係平時扮nice勁好好先生，又借頭借路親近「獵物」。佢哋嘅妒忌心同疑心都比一般人重，小小事都會觸動佢哋嘅反射神經。諗起都毛管戙。

希望下集見到連詩雅吉人天相啦。