霸戲哥之日常#160 │ 狗噏有價

霸戲哥細細個就鍾意睇問題遊戲節目，好似《校際常識問答比賽》呀、《百萬富翁》同《一筆勾銷》呢啲，牙擦擦以為自己乜都識，最開心莫過於見到參賽者唔識答，搞到見財化水。

人大咗，當然知道自己嘅渺小同才疏，心諗換轉自己上去玩《百萬富翁》，分分鐘連保險線都過唔到。

不過，好似我呢類又自大又自以為是嘅人，都有一類遊戲節目啱玩。就係Netflix最新推出嘅問答遊戲節目《亂噏百萬富翁》。遊戲玩法好簡單，參賽者要答一連串常識問題，但唔識答唔緊要，只要扮到自己係專家，吹到其餘三位挑戰者，都以為你真係識答，咁就算答錯，都可以贏取獎金。可以話係專為我呢類識少少扮代表嘅混球而設。

咦，其實都啱啲所謂防疫專家玩噃。

霸戲哥

** 博客文章文責自負,不代表本公司立場 **

連登仔最愛嘅連詩雅 @shi_ga ，終於喺今晚單元《嫁衣》登場，扮演有愛心又蠢蠢哋嘅乖女，準備同男友拉埋天窗。

胡鴻鈞 @hubertwu 就扮裁縫，喺金宵大廈開旗袍店，自細得家人傳授技藝。四眼踏實斯斯文文嘅佢，最叻原來唔係為人度身訂造旗袍，而係設計陷害他人，以達到一己目的。故仔係老套啲，講述胡鴻鈞垂涎連詩雅美色，設計拆散對方，再喺適當時機乘虛而入，好一個變態控制狂。胡鴻鈞又扮得幾入型入格。

呢類變態狗公，sadly，霸戲哥都見識唔少，佢哋共同點係平時扮nice勁好好先生，又借頭借路親近「獵物」。佢哋嘅妒忌心同疑心都比一般人重，小小事都會觸動佢哋嘅反射神經。諗起都毛管戙。

希望下集見到連詩雅吉人天相啦。