霸戲哥之日常#162 │ 鎮屋之寶

雖然潮流興玩NFT，可惜呢輪乜都出一餐，開始玩到爛爛哋。加上係虛擬嘢，買返嚟嘅珍藏冇得揸上手，感覺始終差咁啲。

其實電影收藏品都一樣有價有市。最近外國網站Gotta Have Rock & Roll拍賣一件經典電影道具，鎮喺屋企嘅話，保證屋企人循規蹈矩。佢就係Jack Nicholson喺《閃靈》入面破門入房嘅斧頭！

Here’s Johnny~~~

隨斧頭附送一個display case、4張劇照、一封嚟自NORANK Engineering嘅信件，同埋真品證明書。成set嘢底價5萬美金，依家bid到去11萬美金（即86萬港紙），今日就會結標，真fans仲唔有買趁手（笑）。

霸戲哥

** 博客文章文責自負,不代表本公司立場 **

霸戲哥細細個就鍾意睇問題遊戲節目，好似《校際常識問答比賽》呀、《百萬富翁》同《一筆勾銷》呢啲，牙擦擦以為自己乜都識，最開心莫過於見到參賽者唔識答，搞到見財化水。

人大咗，當然知道自己嘅渺小同才疏，心諗換轉自己上去玩《百萬富翁》，分分鐘連保險線都過唔到。

不過，好似我呢類又自大又自以為是嘅人，都有一類遊戲節目啱玩。就係Netflix最新推出嘅問答遊戲節目《亂噏百萬富翁》。遊戲玩法好簡單，參賽者要答一連串常識問題，但唔識答唔緊要，只要扮到自己係專家，吹到其餘三位挑戰者，都以為你真係識答，咁就算答錯，都可以贏取獎金。可以話係專為我呢類識少少扮代表嘅混球而設。

咦，其實都啱啲所謂防疫專家玩噃。