博客文章
唔講唔知，網民除咗關心TVB股價，都好關心tvbuddy嘅去向。近日就有報道話佢「被消失」，又傳涉違規建築而被清拆。
屈指一算，原來tvbuddy都夠資格拎「老人牌」，07年首次亮相到今日已經15年，日曬雨淋都緊守崗位，最厲害係經歷幾次大颱風，都依然屹立不倒，堪稱最佳員工。
咁究竟tvbuddy去咗邊呢？無綫外事部就回覆，話無綫今年踏入55周年，為隆重其事，tvbuddy今日開始進行修葺，同會以全新面貌同觀眾見面。咁即係唔係被消失，大家可以放心晒。
霸戲哥
** 博客文章文責自負,不代表本公司立場 **
霸戲哥最近喺Netflix睇咗一套動畫《小太郎的一個人生活》，見到畫風仲以為類似《蠟筆小新》嗰類搞笑劇種，點知越睇越伏。個伏位係劇集不但止唔易入口，仲要係極之沉重，睇完個心好似被掏空一樣咁痛，哭相十分慘烈。
一日最衰霸戲哥太孤陋寡聞，《小太郎一個人生活》其實喺日本好出名，佢係改編自2015年推出、由津村麻美創作嘅同名漫畫，依家仲喺《Big Comic Superior》連載緊。故事講小太郎一個人搬入清水某公寓生活，每集都圍繞住佢同鄰居嘅一啲生活逸事，慢慢揭露小太郎嘅悲慘身世。
小太郎雖然只有四歲，仲讀緊幼稚園，但已經有看破紅塵嘅心境，心智比好多成年人都要成熟（至少比佢啲鄰居成熟）。係乜嘢事令小太郎一夜長大？呢個就係霸戲哥一口氣追晒十集嘅原因。
我哋成年人遇少少問題就怨天怨地，其實真係身在福中不知福。大家不妨窺探下小太郎嘅內心世界，學吓佢點樣用正能量去克服困境，或者大家會有另一番體會。
