博客文章
利申霸戲哥唔算係星戰迷，只係咁啱見到歐錦棠大哥嘅facebook，先至醒起今日原來係星戰日（Star Wars Day）。當然係食《星戰》入面句名言「Ｍay the force be with you」嘅黐脷筋版「May the 4th be with you」。
根據偉大嘅維基百科，關於「星戰日」嘅全球大型慶祝活動係近年先出現，但呢句惡搞句字早喺1978年，即《星球大戰》上映翌年已有。而已故前英國首相戴卓爾夫人，於1979年5月4日就職時，亦有醒目編輯用全版廣告恭賀戴卓爾夫人，「May the Fourth Be With You, Maggie. Congratulations！」
呢個非官方認可嘅日子，漸漸成為咗全球星戰迷嘅共同語言，自此每逢呢日，有星戰迷會重溫電影（睇極唔厭），有人會cosplay電影角色，有人舉行《星戰》派對等等，都係一啲商業嘢啦。
唔知大家又點慶祝呢？
霸戲哥
** 博客文章文責自負,不代表本公司立場 **
串流媒體龍頭Netflix早排公佈財報，首次錄得流失訂戶，股價一度暴跌35%，一日蒸發540億美元。Netflix管理層拿拿聲急謀對策開源節流，其中一個方案就係大刀闊斧cut project。哈里王子老婆梅根（Meghan Markle）監製套動畫劇集《Pearl》首當其衝，宣佈胎死腹中。
早兩日霸戲哥都講過，Netflix實在太多動畫啦，就算每日睇一套，估計一年都睇唔完。既然梅根套嘢未開波，煞停都係好理所當然。難為哈里王子兩公婆脫離英國皇室後，成立Archewell製片公司，仲諗住磨拳擦掌製作紀錄片、動畫同兒童節目搵真銀，點知個如意算盤咁快就棘住。好在佢哋製作嘅紀錄片集《Heart of Invictus》仲有得留低，叫做有啲渣拿。
另一方面，Netflix亦考慮推出廣告plan，可以進一步調低月費，吸引訂戶回鍋。假如成事，霸戲哥預計到時成為大輸家嘅，分分鐘係YouTube，事關廣告客戶可能轉移到流瀏量更高嘅Netflix。
一場腥風血雨嘅廣告爭霸戰，肯定仲好睇過戲。
