博客文章
文化傳承嘅重要，應該唔使霸戲哥多講。粵語流行曲嘅傳承，近期就有TVB同芒果TV合製嘅《聲生不息》，老一輩歌手如林子祥、葉蒨文帶住新世代歌手炎明熹、曾比特，坊間反應都唔錯。
至於粵語片呢？近期亦有香港電影評論學會出版同發行嘅新書《昨日的影 今日的光——粵語片劇照風華半世紀》推出，書入面有四百幾幅珍藏嘅粵語片劇照，配合埋唔同文化界名人嘅細膩文章，讓我哋呢代讀者回味昔日明星嘅光彩之餘，又可以加深對舊香港嘅認識。
今個星期六下晝3點鐘，喺高先電影院會舉行簽書會，負責編輯同設計嘅金像導演楊紫燁屆時亦會出席。電影迷不容錯過。
霸戲哥
** 博客文章文責自負,不代表本公司立場 **
利申霸戲哥唔算係星戰迷，只係咁啱見到歐錦棠大哥嘅facebook，先至醒起今日原來係星戰日（Star Wars Day）。當然係食《星戰》入面句名言「Ｍay the force be with you」嘅黐脷筋版「May the 4th be with you」。
根據偉大嘅維基百科，關於「星戰日」嘅全球大型慶祝活動係近年先出現，但呢句惡搞句字早喺1978年，即《星球大戰》上映翌年已有。而已故前英國首相戴卓爾夫人，於1979年5月4日就職時，亦有醒目編輯用全版廣告恭賀戴卓爾夫人，「May the Fourth Be With You, Maggie. Congratulations！」
呢個非官方認可嘅日子，漸漸成為咗全球星戰迷嘅共同語言，自此每逢呢日，有星戰迷會重溫電影（睇極唔厭），有人會cosplay電影角色，有人舉行《星戰》派對等等，都係一啲商業嘢啦。
唔知大家又點慶祝呢？
