霸戲哥之日常#183 │ 電影主題曲

霸戲哥成日覺得，電影主題曲比一般歌曲着數，有啲歌曲只要聽到前奏，腦海自自然然會有個畫面，跟住會不自覺哼住嚟唱。袁鳳瑛唱嘅《天若有情》主題曲就係呢類。

「原諒話也不講半句~」腦海浮現華Dee準備擸刀隊冧喇叭，然後着住婚紗嘅JoJo喺金鐘紅棉路天橋跌跌碰碰咁搵華Dee，一個long shot直落到慢慢出roller credit後散場。

當然，導演陳木勝同編劇阮世生都係功不可沒啦。

噚晚TVB播出第三集《聲生不息》，@cocolee 李玫就揀咗《天若有情》嚟唱。着住大露背低胸婚紗，配上閃閃令嘅鑽石眼淚，行頭比JoJo更行。佢唱嘅「哀怨腔」又有另一番風格，好明顯將自己代入咗去JoJo度。

「此世短暫轉身步過蕭剎了的空間～」李玫直情唱到跪喺地，唔講仲以為JoJo上身添。事實再次證明，唔完美同有遺憾嘅愛情，先至最刻骨銘心。

不過比起《天若有情》，霸戲哥更想聽到Beyond首《灰色軌跡》，唔知之後有冇得聽呢？

霸戲哥

** 博客文章文責自負,不代表本公司立場 **

噚日韓國舉行嘅「第58屆百想藝術大賞」，獲8項提名嘅大熱劇集《魷魚遊戲》，最終奪得電視部門大賞，可惜男主角李政宰大熱倒灶贏唔到視帝寶座。

今集贏唔到啫，續集可以再嚟過。正如魷魚遊戲咁，只要仲有一口氣，都仍然有機會。《魷魚遊戲》續集預計2024年年底喺Netflix面世，導演黃東赫被問到今次有咩點子時，都係例牌懶神秘，淨係話今集嘅新遊戲唔再咁小學雞，保證好過第一集。係咪咁堅，真係聽住先。

上集結局講到終極贏家李政宰原本可以同個女團聚，但去到最後把心一橫再入game，誓要擊潰呢班幕後玩家。