博客文章
如果今日你同班細路講金田一同柯南，佢唔話你老餅已經好厚道。原來喺兒童世界，名偵探一定唔係柯南，而係貌似屁股、但智商有1104嘅「屁屁偵探」。屁屁偵探依家喺全球勁受歡迎，周邊商品多不勝數，當初創作繪本嘅團隊Troll（田中陽子撰文、深澤將秀畫插圖），肯定唔係用屁股諗嘢。
《屁屁偵探》第三部劇場版電影《梳乎厘島的秘密》啱啱上映，日前屁屁偵探親臨嘉禾大埔快閃謝票，家長同細蚊仔爭住排隊影相，聲勢絕對唔輸比奇異博士。
故事講怪盜U預告會偷走位於梳乎厘島嘅寶物「風之路標」（咁其實有咩好查？）。屁屁偵探同汪汪警察局嘅警官接報後前往調查，島上隱藏嘅秘密亦隨即曝光。
大家係咪已經聞到破案嘅味道呢！
霸戲哥
** 博客文章文責自負,不代表本公司立場 **
霸戲哥成日覺得，電影主題曲比一般歌曲着數，有啲歌曲只要聽到前奏，腦海自自然然會有個畫面，跟住會不自覺哼住嚟唱。袁鳳瑛唱嘅《天若有情》主題曲就係呢類。
「原諒話也不講半句~」腦海浮現華Dee準備擸刀隊冧喇叭，然後着住婚紗嘅JoJo喺金鐘紅棉路天橋跌跌碰碰咁搵華Dee，一個long shot直落到慢慢出roller credit後散場。
當然，導演陳木勝同編劇阮世生都係功不可沒啦。
噚晚TVB播出第三集《聲生不息》，@cocolee 李玫就揀咗《天若有情》嚟唱。着住大露背低胸婚紗，配上閃閃令嘅鑽石眼淚，行頭比JoJo更行。佢唱嘅「哀怨腔」又有另一番風格，好明顯將自己代入咗去JoJo度。
「此世短暫轉身步過蕭剎了的空間～」李玫直情唱到跪喺地，唔講仲以為JoJo上身添。事實再次證明，唔完美同有遺憾嘅愛情，先至最刻骨銘心。
不過比起《天若有情》，霸戲哥更想聽到Beyond首《灰色軌跡》，唔知之後有冇得聽呢？
