霸戲哥之日常#185 │ 鬥屈

呢一代嘅後生仔女，好多都得到父母悉心栽培，年紀輕輕已經十八般武藝樣樣精通，真係唔到你唔服。TVB重頭歌唱節目《聲夢傳奇2》日前舉行記招，公佈埋23位入圍學員嘅履歷同資料，個個來頭都非常猛料。參加唱歌比賽啫？使唔使個個演奏家銜頭呀，唔講仲以為面試維也納皇家交響樂團。

其中最猛料要數黃洛妍（Janees）。聽吓有幾猛：學拉小提琴16年，師承已故知名小提琴家鄭石山同小提琴大師Pierre Amoyal，11歲以優異成績喺香港考獲聖三一學院FTCL小提琴演奏文憑。中三赴奧地利讀書同進修音樂，以15歲之齡考入薩爾斯堡莫扎特音樂大學，獲得小提琴演奏學士學位。之後再到維也納普萊納音樂學院深造，考獲小提琴演奏學士學位。喺香港讀書期間，喺香港校際音樂節連續八年奪得小提琴各組別冠軍，堪稱無敵。

或者你會話拉小提琴叻啫，唔代表唱歌都得啩。Janees上年同香港年青樂隊「All For One」合作推出《裂痕》，化身野性rock妹又rap得兩嘴，之後又公開演唱《Havana》、《長相廝守》同《女神》，台型十足兼勁有自信。

《聲夢傳奇2》6月11日正式登場，留名等睇Janees屈機。

霸戲哥

** 博客文章文責自負,不代表本公司立場 **

霸戲哥成日覺得，電影主題曲比一般歌曲着數，有啲歌曲只要聽到前奏，腦海自自然然會有個畫面，跟住會不自覺哼住嚟唱。袁鳳瑛唱嘅《天若有情》主題曲就係呢類。

「原諒話也不講半句~」腦海浮現華Dee準備擸刀隊冧喇叭，然後着住婚紗嘅JoJo喺金鐘紅棉路天橋跌跌碰碰咁搵華Dee，一個long shot直落到慢慢出roller credit後散場。

當然，導演陳木勝同編劇阮世生都係功不可沒啦。

噚晚TVB播出第三集《聲生不息》，@cocolee 李玫就揀咗《天若有情》嚟唱。着住大露背低胸婚紗，配上閃閃令嘅鑽石眼淚，行頭比JoJo更行。佢唱嘅「哀怨腔」又有另一番風格，好明顯將自己代入咗去JoJo度。

「此世短暫轉身步過蕭剎了的空間～」李玫直情唱到跪喺地，唔講仲以為JoJo上身添。事實再次證明，唔完美同有遺憾嘅愛情，先至最刻骨銘心。

不過比起《天若有情》，霸戲哥更想聽到Beyond首《灰色軌跡》，唔知之後有冇得聽呢？