博客文章
續集電影，通常畀人嘅感覺都係拿拿聲拍完等「收割」，十居其十都係劣作，再斬四兩之後就冇之後了。但如果一套相繼13年、慢工出細貨嘅續集，仲要係史上最高票房紀錄保持者嘅續集電影，又會唔會係例外呢?
占士金馬倫套《阿凡達》09年上映，食正IMAX 3D新科技條水，仲記得當年個個二刷三刷睇完又睇，結果全球勁收27億美元。《阿凡達》續集原本目標定喺2014年上映（即8年前），但當時因為水底攝影技術未夠完善，結果映期一再推遲，直至近日喺CinemaCon度，終於播放第一條預告片，同埋定喺今年12月15日上映。
《阿凡達2》故事設喺第一集嘅10年之後，地球戰士Sully決定將意識永久留喺納美人嘅「化身」上，佢娶咗納美族公主Neytiri，同三名子女同一名養子過住平靜生活。今集故事相信都會圍繞Sully嘅身份認同問題，始終納美人對人類仍然存在敵意同不信任。
故事聽落係有啲老土，不過觀眾都會將注意力集中喺畫面同特效之上，不過條預告片似乎驚喜度一般，居然同13年前嘅作品分別不大。希望遲啲有更多新嘢睇，唔好令全球觀眾失望啦。
霸戲哥
** 博客文章文責自負,不代表本公司立場 **
呢一代嘅後生仔女，好多都得到父母悉心栽培，年紀輕輕已經十八般武藝樣樣精通，真係唔到你唔服。TVB重頭歌唱節目《聲夢傳奇2》日前舉行記招，公佈埋23位入圍學員嘅履歷同資料，個個來頭都非常猛料。參加唱歌比賽啫？使唔使個個演奏家銜頭呀，唔講仲以為面試維也納皇家交響樂團。
其中最猛料要數黃洛妍（Janees）。聽吓有幾猛：學拉小提琴16年，師承已故知名小提琴家鄭石山同小提琴大師Pierre Amoyal，11歲以優異成績喺香港考獲聖三一學院FTCL小提琴演奏文憑。中三赴奧地利讀書同進修音樂，以15歲之齡考入薩爾斯堡莫扎特音樂大學，獲得小提琴演奏學士學位。之後再到維也納普萊納音樂學院深造，考獲小提琴演奏學士學位。喺香港讀書期間，喺香港校際音樂節連續八年奪得小提琴各組別冠軍，堪稱無敵。
或者你會話拉小提琴叻啫，唔代表唱歌都得啩。Janees上年同香港年青樂隊「All For One」合作推出《裂痕》，化身野性rock妹又rap得兩嘴，之後又公開演唱《Havana》、《長相廝守》同《女神》，台型十足兼勁有自信。
《聲夢傳奇2》6月11日正式登場，留名等睇Janees屈機。
