博客文章
對上一次同豬視妹去台北旅行，原來已經係2019年嘅11月，最記得當初想上陽明山睇紅葉，點知山長水遠上到去啲葉都未紅，畀豬視妹笑咗成trip。後來新冠肺炎來襲，直至依家打晒針都好，仍然邊度都冇得去。
每次去台北，除咗夾公仔，梗唔少得去夜市飲飲食食，寧夏、士林、淡水老街、饒河街、師大夜市統統去勻晒，雖然有好多古靈精怪嘅小食，但霸戲哥食嚟食去都係嗰幾款，不外乎火焰骰子牛、鹽酥雞同埋大腸包小腸，相當悶蛋。
事實證明，唔係只係霸戲哥鍾意大腸包小腸，女神梁凱晴同宋婭彤都一樣咁鍾意。逢星期一、二晚上10點喺J2播出嘅節目《趁而家去台灣偷食...譜》，啱啱嗰集梁凱晴同宋婭彤就帶觀眾去咗寧夏夜市，品嘗秘製嘅大腸包小腸，回憶當堂返晒嚟。
節目仲會教大家點整台灣美食，好似胡椒餅呀、胡椒蝦咁，大家冇得去旅行，惟有自製美食頂住先啦。
霸戲哥
** 博客文章文責自負,不代表本公司立場 **
呢一代嘅後生仔女，好多都得到父母悉心栽培，年紀輕輕已經十八般武藝樣樣精通，真係唔到你唔服。TVB重頭歌唱節目《聲夢傳奇2》日前舉行記招，公佈埋23位入圍學員嘅履歷同資料，個個來頭都非常猛料。參加唱歌比賽啫？使唔使個個演奏家銜頭呀，唔講仲以為面試維也納皇家交響樂團。
其中最猛料要數黃洛妍（Janees）。聽吓有幾猛：學拉小提琴16年，師承已故知名小提琴家鄭石山同小提琴大師Pierre Amoyal，11歲以優異成績喺香港考獲聖三一學院FTCL小提琴演奏文憑。中三赴奧地利讀書同進修音樂，以15歲之齡考入薩爾斯堡莫扎特音樂大學，獲得小提琴演奏學士學位。之後再到維也納普萊納音樂學院深造，考獲小提琴演奏學士學位。喺香港讀書期間，喺香港校際音樂節連續八年奪得小提琴各組別冠軍，堪稱無敵。
或者你會話拉小提琴叻啫，唔代表唱歌都得啩。Janees上年同香港年青樂隊「All For One」合作推出《裂痕》，化身野性rock妹又rap得兩嘴，之後又公開演唱《Havana》、《長相廝守》同《女神》，台型十足兼勁有自信。
《聲夢傳奇2》6月11日正式登場，留名等睇Janees屈機。
