博客文章
因為《Top Gun》，霸戲哥擁有人生第一件飛機褸（亦係唯一一件）。當年喺街度碌，牛仔褲配飛機褸係指定「飲衣」，記得有年夏天着住佢焗到生熱痱，畀屋企人笑足成年。
1986年一齣咁嘅戲，打造咗個萬人迷Tom Cruise，點會估到36年後，續集《Top Gun: Maverick》個樣幾乎冇變過（好似仲型咗）。但現實係好殘酷嘅，當年女主角Kelly McGillis今年已經64歲，亦都理解點解導演Joseph Kosinski冇搵佢拍續集。
呢套《Top Gun: Maverick》喺5月26日全球上映 ，香港今次終於可以同步嘞。外國評語一致激讚，話有深度過舊作，仲吹到係Tom Cruise從影而嚟最好嘅一套作品添。而今集女主角又有霸戲哥勁like嘅Jennifer Connelly（又係唔識老嗰噃），仲邊有唔買飛入場嘅理由吖？
另外，套戲用咗IMAX認證嘅攝影機拍攝，啲dogfight鏡頭肯定拍到勁震撼，所以識睇一定睇IMAX版。
唔知今次睇完會唔會又買返件飛機褸去襯呢?
霸戲哥
** 博客文章文責自負,不代表本公司立場 **
早年捲入性侵醜聞嘅Kevin Spacey，畀荷李活封殺咗好一段時間，聽聞最近又浮番上水，喺歷史古裝片《1242 – Gateway to the West》扮演重要角色。
Kevin Spacey係人氣劇《紙牌屋》嘅靈魂人物，但霸戲哥其實一集都冇睇過。認識Kevin Spacey，係讀U嗰陣學人睇西片，發現佢嘅演技同一般明星好唔同，尤其皮笑肉不笑嗰陣，明明演好人角色（如《Pay it Forwad》），都硬係覺得有陰謀。而呢種感覺比鄭子誠更為嚴重。
亦因為咁，Kevin Spacey有份演嘅戲，霸戲哥都好少miss。好似啲得獎片《American Beauty》呀、《The Usual Suspects》同《L.A. Confidential》就唔使講，好似比較冷門嘅如《The Shipping News》、《K-Pax》同《The Life of David Gale》都lun晒，最記得當年流行買VCD，Kevin Spacey嘅戲我係成幢咁掃。
Kevin Spacey單醜聞，到今日都告唔入，會唔會有一個可能係無辜嘅呢？但即使告唔入，佢嘅損失，包括人格同金錢上，都已經冇得彌補，如果佢真係無辜嘅，就實在太可惜。霸戲哥真心覺得佢係一個難得一見嘅好演員，比起好多所謂一線明星更好戲，亦期待佢之後更多嘅演出。
大家又會唔會畀機會佢呢？
