博客文章
阿Bob林盛斌@bob_lamshingbun 主持嘅《360秒人生課堂》好高質，可以話係近年TVB最優秀嘅節目之一，因為觀眾睇完節目，係真係會有得着。
噚晚播出最後一集（不過應會添食第二季啦），final Bob壓軸出場，分享初出道畀人睇唔起嘅往事。霸戲哥特別有共鳴，尤其畀人當透明嗰part。
初初入行，霸戲哥就遇到一個當我廢人嘅上司，姑且叫佢肥L吧，每日只安排低等嘅工作我做，日復日咁蹉跎咗兩年。人工低唔在講，仲要日日畀佢做出氣袋，鬧到連隔離department都走嚟八卦。最記得肥L嗰句「做人最緊要有邏輯」，霸戲哥心諗最冇邏輯就係由佢講呢句。
我同阿Bob一樣喺度等機會，終於得到另一個老細賞識，從此脫離苦海。我唔敢話自己平步青雲，但至少肥L畀人炒魷嗰日，我係有份送佢一程嘅。
依家諗返轉頭，人生如果冇嗰兩年地獄，又點會有今日嘅自己？其實冇乜必要恨呢啲人，因為你嘅成功，已經係對佢哋最大嘅報復。
你都要繼續努力，做更多高質節目呀正義之Bob！
霸戲哥
** 博客文章文責自負,不代表本公司立場 **
早年捲入性侵醜聞嘅Kevin Spacey，畀荷李活封殺咗好一段時間，聽聞最近又浮番上水，喺歷史古裝片《1242 – Gateway to the West》扮演重要角色。
Kevin Spacey係人氣劇《紙牌屋》嘅靈魂人物，但霸戲哥其實一集都冇睇過。認識Kevin Spacey，係讀U嗰陣學人睇西片，發現佢嘅演技同一般明星好唔同，尤其皮笑肉不笑嗰陣，明明演好人角色（如《Pay it Forwad》），都硬係覺得有陰謀。而呢種感覺比鄭子誠更為嚴重。
亦因為咁，Kevin Spacey有份演嘅戲，霸戲哥都好少miss。好似啲得獎片《American Beauty》呀、《The Usual Suspects》同《L.A. Confidential》就唔使講，好似比較冷門嘅如《The Shipping News》、《K-Pax》同《The Life of David Gale》都lun晒，最記得當年流行買VCD，Kevin Spacey嘅戲我係成幢咁掃。
Kevin Spacey單醜聞，到今日都告唔入，會唔會有一個可能係無辜嘅呢？但即使告唔入，佢嘅損失，包括人格同金錢上，都已經冇得彌補，如果佢真係無辜嘅，就實在太可惜。霸戲哥真心覺得佢係一個難得一見嘅好演員，比起好多所謂一線明星更好戲，亦期待佢之後更多嘅演出。
大家又會唔會畀機會佢呢？
