博客文章
豬視妹除咗煲劇叻，煲湯煮飯都有一手，任何餸菜食材擺喺佢面前，就算係蔗渣嘅價錢，一樣煮到燒鵝嘅味道。
不過「天才小廚師」都有佢嘅弱點，就係只限於家常小菜，講到煮啲高難度嘅譬如宮廷菜，始終冇乜機會去學同試。高級食材咁貴，哪有錢？
自己冇得食啫，都可以睇吓人哋點煮嘛。TVB聽晚起逢星期一至五晚8點半，將會播出人氣內地劇《尚食》。《尚食》由《延禧攻略》班底製作，故事以明朝為背景，講吳謹言飾演嘅尚食局宮女，精通烹調中華美食，又復原好多歷代失傳嘅食譜。劇集除咗有美食同傳統文化元素，例牌唔少得梗係有宮廷權鬥啦，估計又會借啲意滲入少少女權主義，打破父權社會嘅刻板框框。
據講劇組花咗超過半年時間搜集資料，劇中涉及嘅菜式涵蓋咗魯、川、粵、京、閩、 浙、蘇、徽等菜系，好適合豬視妹去偷師。若然有鼎爺李家鼎做聲音導航，又或者親手示範埋劇中幾道撚手菜式點整，就梗係冇得輸啦。
霸戲哥
** 博客文章文責自負,不代表本公司立場 **
阿Bob林盛斌@bob_lamshingbun 主持嘅《360秒人生課堂》好高質，可以話係近年TVB最優秀嘅節目之一，因為觀眾睇完節目，係真係會有得着。
噚晚播出最後一集（不過應會添食第二季啦），final Bob壓軸出場，分享初出道畀人睇唔起嘅往事。霸戲哥特別有共鳴，尤其畀人當透明嗰part。
初初入行，霸戲哥就遇到一個當我廢人嘅上司，姑且叫佢肥L吧，每日只安排低等嘅工作我做，日復日咁蹉跎咗兩年。人工低唔在講，仲要日日畀佢做出氣袋，鬧到連隔離department都走嚟八卦。最記得肥L嗰句「做人最緊要有邏輯」，霸戲哥心諗最冇邏輯就係由佢講呢句。
我同阿Bob一樣喺度等機會，終於得到另一個老細賞識，從此脫離苦海。我唔敢話自己平步青雲，但至少肥L畀人炒魷嗰日，我係有份送佢一程嘅。
依家諗返轉頭，人生如果冇嗰兩年地獄，又點會有今日嘅自己？其實冇乜必要恨呢啲人，因為你嘅成功，已經係對佢哋最大嘅報復。
你都要繼續努力，做更多高質節目呀正義之Bob！
