博客文章
霸戲哥係百分百躺平族，自己同身邊人都未照顧得掂，梗係唔會生小孩啦。眼見身邊一個二個老死，做咗湊仔公湊仔婆後忙到私人時間都冇埋，覺得做人父母真係好偉大同勇敢。
唔做父母啫，都一樣可以睇節目嘅。最新一輯TVB節目《日日媽媽聲》，依家逢星期一至三晚上10點半喺翡翠台播出。今輯繼續由余安安、陳凱琳同羅敏莊做主持，每集請星爸媽上嚟分享（主要痛苦）經歷。
噚晚嗰集就搵咗劉小慧、陳柏宇同阿Bob林盛斌做嘉賓。育有三女一子嘅阿Bob既然上得嚟，點會完整出返去！三位主持安排「大刑伺候」阿Bob，喺佢腰上綁咗兩個電流器，等佢模擬體驗女人M痛之苦，真係痛到媽媽聲。
強烈推薦男士睇呢個節目，睇完保證你會對另一半好好多。冇咩事我都係繼續搵錢先。
霸戲哥
** 博客文章文責自負,不代表本公司立場 **
早兩日霸戲哥咁啱講起電影主題曲，提到《當年情》係我嘅Top 5，估唔到依家有機會畀我入戲院聽。嚟緊高先電影院將會播放三場《英雄本色 (4K修復版)》（場次與購票詳情在文尾），依家已經賣緊飛，想重溫當年情就拿拿聲買，手快有手慢冇。
霸戲哥已經數唔出睇過幾多次《英雄本色》（超過20次），但第一次睇並唔喺戲院，而係睇電視重播。記得嗰時應該讀緊小學，開始吸收唔同嘅價值觀，而《英雄本色》的確好影響到我嘅成長。
八十年代嘅電影，多數正邪分明，角色比較刻板，警察係忠，賊就係奸，唔需用腦過濾。《英雄本色》最厲害嘅地方，係一開始已講明主角狄龍同周潤發係黑社會，殺人放火乜都敢做，但觀眾唔會當佢哋係壞人不突止，相反仲會代入佢哋嘅處境，去思考同分辨善惡。
由嗰刻開始，霸戲哥已經知道，善惡嘅區分，並唔係喺職業，而係言行。警察未必一定行善，做賊亦未必一定行惡。而往往喺最危難嘅時候，能夠伸張正義嘅，先至係英雄本色。高高在上，用職權凌駕別人嘅，唔算得上英雄。
當然，《英雄本色》亦教曉我要重情重義。或者因為自己讀男校，大學又住Hall，兄弟情（唔係hehe）特別濃厚。兄弟有難，我哋會赴湯蹈火；兄弟離別，我哋會百般思念；兄弟犯錯，我哋會痛心疾首。
「今日我，與你又試肩並肩，當年情，再度添上新鲜。」黃霑嘅詞真係無敵，講中晒霸戲哥呢刻嘅心境。
