霸戲哥之日常#205 │ 被忽略的天才

《尋人記II》特登吊觀眾癮，拆開兩集訪問「投訴之王」梁安國，噚晚見識完佢嘅「家檔」同待人接物方式之後 ，今集嘗試拆解點解佢有咁特別嘅性格，仲請埋精神科醫生同佢做評估。而得出結論就係，安仔可能有自閉症，唔識同人溝通，先形成社交障礙。

正如方東昇喺節目入面嘅round up，安仔主動尋找嘅唔係方東昇，而係一份認同感。《浮誇》歌詞講中晒：「其實怕被忘記，至放大來演吧。」然後就不停投訴引人注意，直至對方買佢怕，或者所謂嘅妥協。

安仔呢種人，霸戲哥都遇過好幾個，佢哋嘅共通點就係性格孤僻，唔鍾意埋堆，同埋IQ極高。記得有個同學仔，當年讀書成績極差，但可以將《水滸傳》108個好漢嘅綽號、排名同星宿一字不漏咁背晒出嚟；又有一個成日畀人烚嘅同學，平日傻傻更更，但捉中國象棋幾乎未逢敵手。

成日話，天才同白癡只有一線之差，呢方面霸戲哥係信到十足。潮流興講What if，我相信假若安仔當年已被人賞識，以佢鍥而不捨嘅毅力必定大有作為，佢嘅人生道路肯定會好唔一樣。

霸戲哥

** 博客文章文責自負,不代表本公司立場 **

尋那個他真的很興奮。由方東昇主持嘅TVB節目《尋人記II》今晚播出，首集主角、人稱「元祖級投訴王」嘅安仔登場。以往尋人主角，都係由方東昇率領黃曉瑩、李曉欣同黃靖婷捐窿捐罅摑出嚟，今次安仔反客為主自動送上門。

投訴王安仔唔係浪得虛名，自詡「元朗特首梁安國」，三十多年來一直與政府各部門交涉，例必鍥而不捨咁投訴到滿意為止，好多高官都買佢怕。節目入面，方東昇同佢落一轉街市，有檔主夾道歡迎半賣半送，有檔主當佢鬼見愁避之則吉。一個咁爭議性嘅人，究竟投訴係為咗自肥？抑或為咗公義？節目冇下定論，看倌自行判斷。

香港係公認嘅「投訴之都」，少少事都投訴一餐，但其實好多投訴個案唔係為咗公義，唔係為咗啖氣，而只不過係「搵着數」。就以送外賣為例，大把西客以「倒瀉湯」為由投訴，其實只係想賺coupon，或者呃免費餐食。

但點解一個城市會有咁多投訴？又點解投訴人往往都攞到着數？呢個反而係霸戲哥最想知。

《尋人記II》逢星期四、五晚上10點半喺翡翠台播出。