博客文章
霸戲哥細個淨係喺球場度碌，冇參加過童子軍，錯過咗好多野外求生嘅體驗。到人大咗，想學人camping煮飯仔，又驚拿手唔成勢，次次plan到最後臨門一腳都係打退堂鼓。
啲人成日話「有心唔怕遲」，好多都係得個講字。你點估到野外新手陳柏霖真係坐言起行，立晒露營架撐，深入台灣森林秘境一個月，去感受吓大自然氣息。佢最近主持嘅真人騷節目《極島森林》，依家喺Disney+上架，第一季暫時播咗三集，反應非常熱烈，陳柏霖隻「柴犬Afuri」更加係人氣王。豬視妹依家日日入去check吓有update未（講明逢星期六更新），認真誇張。
節目賣點除咗有台灣嘅隱世靚景，靚仔陳柏霖亦肯定佔好高數。陳柏霖絕對唔係口才好嘅主持，亦唔擅長搞氣氛，但睇佢木木獨獨咁紮營生火煮嘢食，有一種莫命其妙嘅治癒感。或者呢啲就叫慢活啦，搞到霸戲哥同豬視妹更加想去台灣。
陳柏霖又邀請咗《詭扯》拍檔劉冠廷做嘉賓，兩人鬼扯到喺荒山野嶺釣魚捉蟹，嗰份bromance真係難能可貴。聽聞遲啲仲有《藍色大門》拍檔桂綸鎂登場添，真係好期待。
睇嚟霸戲哥係時候入定啲營具，鼓起勇氣投奔大自然懷抱。
霸戲哥
** 博客文章文責自負,不代表本公司立場 **
旺角朗豪坊天線得得B粉身碎骨事件，意外令玩具店Kk plus衝出國際，外國網站Reddit都議論紛紛。霸戲哥今朝一早已經同豬視妹打賭，話夜晚TVB嘅《東張西望》實有follow up，結果不負眾望，真係做到嘢。
近年《東張西望》已經成為市民嘅發聲渠道，無論係曱甴屋、老鼠屋、啞女公屋被侵佔，抑或大小民生問題，都會主持公道。坊間甚至有「推上東張西望關注組」專頁，網民有咩冤屈都可以申訴。
今次得得B事件，雖然Kk plus已經願意全數退回賠償，又出晒聲明咁，但霸戲哥依然覺得仲有好多事情未解決。《東張西望》可唔可以再跟進？
1. 當日職員有冇誤導家長，話佢個仔用腳踢冧得得B，等佢哋以為理虧而迅速賠錢了事？如有，嗰位職員有冇受到口頭勸喻／懲罰？
2. 如果當日冇條流出嘅CCTV，推翻阿仔踢冧得得B之說，家長嗰3萬幾係咪收唔番？
3. 如果阿仔因為畀家長責備而產生童年陰影，精神創傷又點賠同邊個賠？
4. 喺自由市場框架下，商舖係咪可以隨意將貨品mark高個價？就算明知冇人買都好。
5. 陸偉雄律師話，若果遇到呢啲情況，可以唔使賠錢住, 或者搵公正行去處理。咁如果搵公正行／打官司嘅錢仲貴過賠嘅錢，咁又應該點處理？
6. 陸偉雄又提到，10歲以下嘅細路係冇刑責，只要證明佢哋唔係蓄意破壞展品就得。但係點樣為之蓄意？如果佢哋扮不經意咁破壞又點計？咁店舖咪好冇保障？
7. Kk plus今次公關做得「咁出色」，同層其他店舖嘅人流量會唔會因而銳減? 佢哋嘅損失又可以算到邊個頭上？
霸戲哥暫時諗到咁多，大家有咩補充不妨喺下面留言。
