霸戲哥之日常#213 │ 得得B迷思

旺角朗豪坊天線得得B粉身碎骨事件，意外令玩具店Kk plus衝出國際，外國網站Reddit都議論紛紛。霸戲哥今朝一早已經同豬視妹打賭，話夜晚TVB嘅《東張西望》實有follow up，結果不負眾望，真係做到嘢。

近年《東張西望》已經成為市民嘅發聲渠道，無論係曱甴屋、老鼠屋、啞女公屋被侵佔，抑或大小民生問題，都會主持公道。坊間甚至有「推上東張西望關注組」專頁，網民有咩冤屈都可以申訴。

今次得得B事件，雖然Kk plus已經願意全數退回賠償，又出晒聲明咁，但霸戲哥依然覺得仲有好多事情未解決。《東張西望》可唔可以再跟進？

1. 當日職員有冇誤導家長，話佢個仔用腳踢冧得得B，等佢哋以為理虧而迅速賠錢了事？如有，嗰位職員有冇受到口頭勸喻／懲罰？

2. 如果當日冇條流出嘅CCTV，推翻阿仔踢冧得得B之說，家長嗰3萬幾係咪收唔番？

3. 如果阿仔因為畀家長責備而產生童年陰影，精神創傷又點賠同邊個賠？

4. 喺自由市場框架下，商舖係咪可以隨意將貨品mark高個價？就算明知冇人買都好。

5. 陸偉雄律師話，若果遇到呢啲情況，可以唔使賠錢住, 或者搵公正行去處理。咁如果搵公正行／打官司嘅錢仲貴過賠嘅錢，咁又應該點處理？

6. 陸偉雄又提到，10歲以下嘅細路係冇刑責，只要證明佢哋唔係蓄意破壞展品就得。但係點樣為之蓄意？如果佢哋扮不經意咁破壞又點計？咁店舖咪好冇保障？

7. Kk plus今次公關做得「咁出色」，同層其他店舖嘅人流量會唔會因而銳減? 佢哋嘅損失又可以算到邊個頭上？

霸戲哥暫時諗到咁多，大家有咩補充不妨喺下面留言。

霸戲哥

** 博客文章文責自負,不代表本公司立場 **

豬視妹見悶悶地，話想睇番齣恐怖片嚟自虐一下。咁啱喺Netflix見到有齣《漩渦》，霸戲哥即時諗起伊藤潤二套經典漫畫，雖然明知冇關，但都決定click入去睇。

套戲全名其實係《漩渦：恐懼鬥室新遊戲》，亦即《恐懼鬥室》系列分拆出嚟嘅外傳戲。霸戲哥唔係《恐懼鬥室》fans，但都知呢套嚴格嚟講算係第九集，唔知有冇機會破我哋《陰陽路》嘅紀錄呢？

《漩渦》雖有Chris Rock同Samuel Jackson孭飛，不過爛蕃茄評分只係得37%，上年上畫時都幾無聲無息。呢集依然有「I want to play a game」，但Jigsaw其實冇出現，負責殺人嘅變態佬只係模仿Jigsaw犯案。故事講警探Chris Rock多年前因為舉報同袍濫用私刑，而遭到警局上下排擠，某日伙拍新丁調查一宗地鐵撞死人案件，發現死者原來係警察兼好友，犯案手法更十足十Jigsaw。隨住劇情推進，班警察逐個逐個被殺，連Chris Rock老竇Samuel Jackson都成為嫌疑犯……

套戲故事結構都算完整，探討嘅社會公義問題亦值得反思。可惜嘅係，《恐懼鬥室》系列最精采嘅部份梗係啲死亡遊戲設計，呢集嘅設計血腥有餘，緊張程度欠奉，而final boss亦唔算太難估。

不過見到豬視妹睇到定晒神，呢套算勉強收貨啦。