霸戲哥之日常#217 │ Chip定Dale

有一段好無聊嘅日子，霸戲哥同豬視妹極度沉迷夾公仔。雖然「策略上」我哋主攻小熊維尼，但有時都會夾到「雜魚」，Chip n Dale就係呢type，見佢哋哨哨哋牙笑口噬噬咁幾得意，收藏嫌阻掟，棄之又可惜。最慘嘅係，你永遠分唔清邊隻係阿Chip，邊隻叫阿Dale。

所以當人人話Disney+有套《救難小英雄電影版》好好睇，霸戲哥起初都好hesitate，心諗呢類戲都係適宜一家大細睇，嘻嘻哈哈笑完就算。後來聽人講套戲惡搞不同片商嘅卡通人物（唔知點拎到版權），又狂串荷李活電影嘅粗製濫造，聽落又好似幾過癮喎。

故事係講Chip n Dale自從拍完《救難小英雄》後大受歡迎，兩鼠之後各自各生活。30年後，一位前拍檔Monty突然失蹤，Chip n Dale決定重組拯救舊拍檔。

套戲好明顯唔係畀細路睇，因為戲入面角色嘅對白、登場嘅角色，都係極盡諷刺之能事，細路完全會一頭霧水，但成年人睇到自己心儀嘅卡通變成岩岩巉巉，直情係童年崩壞。

霸戲哥覺得最好笑係，其中一隻花鼠（究竟係Chip定Dale？）因為要喺新戲擔正，被迫變成3D版，之後成齣戲就以3D核突造型亮相，控訴味濃到呢。

唔好乜鬼卡通都3D啦，好無？

霸戲哥

** 博客文章文責自負,不代表本公司立場 **

有睇開霸戲台嘅讀者都知，霸戲哥同豬視妹不時留意陸永主持嘅J2節目《逝者代言人》，可能本身多少有啲病態啦，對「雨夜屠夫」、「紙盒藏屍」呢類奇案特別好奇。

原來今晚已經去到最後一集，內容居然係講霸戲哥覺得最恐怖同噁心嘅「Hello Kitty藏屍案」！大佬真係要留番最後先打⋯⋯

好記得案發當年，霸戲哥考完A-Level冇耐，成日流連尖沙咀加連威老道，點會知道嗰度發生咗單咁轟動嘅碎屍加烹屍案⋯⋯又點會知道有人癲到會將頭骨塞入隻Hello Kitty入面⋯⋯

當時嘅報章其實都好癲，將庭上審訊過程繪形繪聲咁用文字同圖像表達，包括虐打死者經過、餵吃屎尿情形、同碎屍烹屍過程，真係一世都記得。

更癲嘅係，圍繞呢單案有好多解釋唔到嘅靈異事件（自行維基），種種跡象都好似係死者冤魂不息嘅表現⋯⋯

最癲嘅係，涉案三名被告最終被判誤殺罪成，其中兩人被判終身監禁（首宗誤殺判終身監禁），而其中一個上訴得直改判18年，同已經放咗出嚟⋯⋯

Anyway，大家有興趣知多啲呢單案，不妨留意今晚11點播出嘅《逝者代言人》，又或者買本翁靜晶嘅《危險人物II》嚟睇。