博客文章
係喎，日本偵探界冇理由畀屁屁偵探玩晒嘛！今年係經典偵探漫畫《金田一少年之事件簿》30週年，全新一輯真人版劇集，亦將於6月1號登陸Disney+。屈指一算，原來呢輯已經係第五代金田一。
年輕讀者或者有所不知，由堂本剛同友坂理惠主演嘅第一代《金田一少年之事件簿》喺香港播出時有幾震撼。由於每集案件都係連環兇殺案，死者死相又離奇恐怖，就算無綫安排喺深夜時段播，一樣收到唔少煩膠家長投訴。最記得霸戲哥有位自命IQ奇高嘅同學，無端端走去改名叫阿一，好明顯當正自己係金田一。
霸戲哥對《金田一》最深厚嘅記憶，唔係青春無敵嘅友坂理惠，亦唔係無啦啦「以爺爺名義發誓」，而係嗰首「所有嘅謎已經解開晒」（同埋每集預告）時奏出嘅洗腦配樂，然後堂本剛會懶醒咁對住鏡頭，再叫劍持勇call齊一班嫌疑犯圍爐聽故仔，諗番起都有點兒戇居。
第五代金田一由尊尼事務所偶像團體「浪花男子」成員道枝駿佑飾演，七瀨美雪就由上白石萌歌飾演，佢哋兩個有冇火花，真係要拭目以待。
霸戲哥
** 博客文章文責自負,不代表本公司立場 **
噚晚播出嗰集《尋人記II》，主角係30年前接受過《星期日檔案》訪問嘅「N無男孩」（無人理，無人教，無人陪，無飯開），當觀眾好似豬視妹一樣，期待男孩逆境自強，繼而寫下一個牽動人心嘅勵志故事時，抱歉，今集要令大家失望。
文仔叫徐志文，方東昇搵佢一啲都唔難，因為30年後志文根本冇離開過自己成長嘅社區——柴灣。39歲嘅志文，個樣冇乜點變，係多咗幾分歲月嘅滄桑，以前蝦蝦霸霸嘅牛精樣，今日換成不自覺嘅靦腆笑容。志文見到攝製隊搵到上門（車仔麵檔），有啲手足無措，佢又點會估到30年後，自己竟然會再做主角。
睇留言見好多人話志文性格樂觀，遇到幾唔如意都一笑置之。但霸戲哥覺得唔係咁。每次見志文尷尬咁笑，個心就嗱住嗱住，情況就好似黃Sir睇番以前段訪問片一樣。我覺得志文成日笑，只不過係啟動咗自我保護嘅機制，唔想重提舊事，潛台詞就係「無所謂啦，反正生活都係咁過。」久而久之，練就咗志文呢種一日過一日嘅生存意識。
然後你會諗：如果志文有個快樂童年，或者喺健康家庭中成長，人生係咪會好唔一樣？我唔敢話志文依家過得唔好，只係覺得佢嘅人生或者可以更豐富，而唔係只記住喺托管中心嗰兩年。
要記住，志文其實係咁多「N無男孩」嘅其中一個，香港究竟有幾多「N無」，有幾多去咗行蠱惑？有幾多做咗老童？又有幾多人間蒸發？
呢集《尋人記II》唔單止係尋人， 而係要觀眾反思點樣令下一代有個合格嘅成長環境。
無能力照顧下一代嘅，係咪可以考慮吓唔好生?
