霸戲哥之日常#218 │ 悲劇人生

噚晚播出嗰集《尋人記II》，主角係30年前接受過《星期日檔案》訪問嘅「N無男孩」（無人理，無人教，無人陪，無飯開），當觀眾好似豬視妹一樣，期待男孩逆境自強，繼而寫下一個牽動人心嘅勵志故事時，抱歉，今集要令大家失望。

文仔叫徐志文，方東昇搵佢一啲都唔難，因為30年後志文根本冇離開過自己成長嘅社區——柴灣。39歲嘅志文，個樣冇乜點變，係多咗幾分歲月嘅滄桑，以前蝦蝦霸霸嘅牛精樣，今日換成不自覺嘅靦腆笑容。志文見到攝製隊搵到上門（車仔麵檔），有啲手足無措，佢又點會估到30年後，自己竟然會再做主角。

睇留言見好多人話志文性格樂觀，遇到幾唔如意都一笑置之。但霸戲哥覺得唔係咁。每次見志文尷尬咁笑，個心就嗱住嗱住，情況就好似黃Sir睇番以前段訪問片一樣。我覺得志文成日笑，只不過係啟動咗自我保護嘅機制，唔想重提舊事，潛台詞就係「無所謂啦，反正生活都係咁過。」久而久之，練就咗志文呢種一日過一日嘅生存意識。

然後你會諗：如果志文有個快樂童年，或者喺健康家庭中成長，人生係咪會好唔一樣？我唔敢話志文依家過得唔好，只係覺得佢嘅人生或者可以更豐富，而唔係只記住喺托管中心嗰兩年。

要記住，志文其實係咁多「N無男孩」嘅其中一個，香港究竟有幾多「N無」，有幾多去咗行蠱惑？有幾多做咗老童？又有幾多人間蒸發？

呢集《尋人記II》唔單止係尋人， 而係要觀眾反思點樣令下一代有個合格嘅成長環境。

無能力照顧下一代嘅，係咪可以考慮吓唔好生?

霸戲哥

** 博客文章文責自負,不代表本公司立場 **

有一段好無聊嘅日子，霸戲哥同豬視妹極度沉迷夾公仔。雖然「策略上」我哋主攻小熊維尼，但有時都會夾到「雜魚」，Chip n Dale就係呢type，見佢哋哨哨哋牙笑口噬噬咁幾得意，收藏嫌阻掟，棄之又可惜。最慘嘅係，你永遠分唔清邊隻係阿Chip，邊隻叫阿Dale。

所以當人人話Disney+有套《救難小英雄電影版》好好睇，霸戲哥起初都好hesitate，心諗呢類戲都係適宜一家大細睇，嘻嘻哈哈笑完就算。後來聽人講套戲惡搞不同片商嘅卡通人物（唔知點拎到版權），又狂串荷李活電影嘅粗製濫造，聽落又好似幾過癮喎。

故事係講Chip n Dale自從拍完《救難小英雄》後大受歡迎，兩鼠之後各自各生活。30年後，一位前拍檔Monty突然失蹤，Chip n Dale決定重組拯救舊拍檔。

套戲好明顯唔係畀細路睇，因為戲入面角色嘅對白、登場嘅角色，都係極盡諷刺之能事，細路完全會一頭霧水，但成年人睇到自己心儀嘅卡通變成岩岩巉巉，直情係童年崩壞。

霸戲哥覺得最好笑係，其中一隻花鼠（究竟係Chip定Dale？）因為要喺新戲擔正，被迫變成3D版，之後成齣戲就以3D核突造型亮相，控訴味濃到呢。

唔好乜鬼卡通都3D啦，好無？