博客文章
霸戲哥深信，無論你生於邊個年代，都會有一首代表住自己成長嘅歌曲，大前提係你要深愛呢個地方。霸戲哥嘅呢首歌，就係張國榮首《Monica》。
《Monica》嗰種紅嘅程度，就係當一個字都未識嘅豆丁，都能夠唸口黃跟住唱「thanks thanks thanks」，當然佢無法理解「戀愛真諦」 ，更唔會知乜嘢叫「好多謝分手你啟發了我」。亦因為《Monica》，我迷上咗張國榮，迷上咗廣東歌，更迷上咗廣東歌嘅詞。
由《聲生不息》播出以嚟，霸戲哥一直期待有歌手翻唱《Monica》，結果今晚終於等到。由李玟同曾比特重新演繹《Monica》，有啲Jazz又有啲rock，感覺都幾特別。廣東歌有度好，就係隨住嘅時代改變，可以重新編曲，衍生出唔同版本，但歌詞永遠係精髓，係劃時代嘅產物。
今晚另一個驚喜，就係見到炎明熹以懷舊look唱出梁詠琪首《我鍾意》。之前聽佢唱都係苦情歌多，難得今次唱番首輕快調皮嘅，霸戲哥同豬視妹都覺得耳目一新，最重要係設合番佢年齡嘛。
霸戲哥
** 博客文章文責自負,不代表本公司立場 **
第75屆康城電影節圓滿落幕，韓國導演朴贊旭憑《分手的決心》奪得最佳導演，而韓國影星宋康昊就憑《孩子轉運站》奪得康城影帝，堪稱韓國之夜。
霸戲哥同豬視妹傾開先知，原來宋康昊今次係首奪康城影帝，之前成日錯覺佢拎過，可能係 「曼德拉效應」啦 。點都好，宋康昊係繼葛優、梁朝偉、柳樂優彌同Shahab Hosseini之後，第五位亞洲人拎康城影帝（如果冇記錯）。
原本《分手的決心》同是枝裕和套《孩子轉運站》係最高榮譽金棕櫚獎大熱，但最後都輸咗畀瑞典導演Ruben Ostlund執導嘅《Triangle of Sadness》。霸戲哥之前都睇過Ruben套《The Square》（《方寸見人心》），亦都係金棕櫚獎得主，睇嚟正方形同三角形都幾旺呢位瑞典導演，唔知下套會唔會出埋圓形？
Ruben擅於用黑色幽默去諷刺社會嘅虛偽同上流嘅光怪陸離。《Triangle of Sadness》就講述一對模特兒KOL，獲邀免費上郵輪吃喝玩樂，但隨住一場風暴，船上人嘅社會地位同階層嚟個大逆轉。聽聞有幕令人極度嘔心嘅嘔吐戲，出名「tough」又見慣大場面嘅康城觀眾都頂唔順。
搞到霸戲哥好想睇添。
