霸戲哥之日常#222 │ 韓國之夜

第75屆康城電影節圓滿落幕，韓國導演朴贊旭憑《分手的決心》奪得最佳導演，而韓國影星宋康昊就憑《孩子轉運站》奪得康城影帝，堪稱韓國之夜。

霸戲哥同豬視妹傾開先知，原來宋康昊今次係首奪康城影帝，之前成日錯覺佢拎過，可能係 「曼德拉效應」啦 。點都好，宋康昊係繼葛優、梁朝偉、柳樂優彌同Shahab Hosseini之後，第五位亞洲人拎康城影帝（如果冇記錯）。

原本《分手的決心》同是枝裕和套《孩子轉運站》係最高榮譽金棕櫚獎大熱，但最後都輸咗畀瑞典導演Ruben Ostlund執導嘅《Triangle of Sadness》。霸戲哥之前都睇過Ruben套《The Square》（《方寸見人心》），亦都係金棕櫚獎得主，睇嚟正方形同三角形都幾旺呢位瑞典導演，唔知下套會唔會出埋圓形？

Ruben擅於用黑色幽默去諷刺社會嘅虛偽同上流嘅光怪陸離。《Triangle of Sadness》就講述一對模特兒KOL，獲邀免費上郵輪吃喝玩樂，但隨住一場風暴，船上人嘅社會地位同階層嚟個大逆轉。聽聞有幕令人極度嘔心嘅嘔吐戲，出名「tough」又見慣大場面嘅康城觀眾都頂唔順。

搞到霸戲哥好想睇添。

霸戲哥

** 博客文章文責自負,不代表本公司立場 **

早兩日霸戲哥先寫完《救難小英雄》，入面經典卡通角色甩頭甩骨，童年回憶大崩壞。大家若嫌唔夠重口味，嚟緊一定要留意呢部《Winnie the Pooh: Blood and Honey》。

就咁睇戲名，你梗係以為又一齣合家歡嘅小熊維尼電影，又點會諗到呢個blood原來咁血腥。

套戲故事都好cult，話Christopher Robin要上大學，賴低咗維尼同豬仔冇人照顧，由於生活太過艱難，維尼同豬仔回歸獸性，變得凶殘暴戾。其中有幕，有位美女享受緊按摩浴，維尼同豬仔潛伏美女身後，用哥羅芳將佢迷魂，再拖佢去公路開車將對方輾死。大佬，呢啲咩狗屎橋段嚟架⋯⋯

據講套戲淨係拍咗10日，依家做緊後期，好明顯都係low budget片格局，即係少少血腥、少少怪雞同少少香艷。

你會問，惡搞套咁嘅片，真係過到迪士尼嗰關？又原來A. A. Milne喺1925年創作嘅小熊維尼，喺2022年1月1號開始已經公有化（只限原版），但跳跳虎就仲未有牌權。

又長知識啦。