博客文章
朋友傳來一條電影預告片，戲名叫《一樣的天空》，據講是為慶祝香港回歸25周年而拍，由四大電影公司銀都、英皇、寰亞同天下一聯手，集合共三十多位演員演出，相當架勢。
從來大堆頭製作，演員好難有發揮空間，唯獨@siumong 周祉君飾演嘅角色「恆仔」，患有自閉同強迫症，可能會有驚喜。為咗揣摩角色，佢都有做足功課，除咗觀察患者嘅行為舉止之外，亦嘗試了解佢哋嘅內心世界，然後設計咗啲動作，好似行路轉彎一定要90度咁。
周祉君早前喺劇集《IT狗》飾演阿Lou形象入屋，劇入面亦敵亦友嘅凌文龍，咁啱都喺《黃金花》都演過自閉症患者，唔知周祉君有冇請教過凌文龍呢？
周祉君算係繼姜皓文、岑珈其之後嘅新一代綠葉王，近年港產片幾乎套套都見到佢嘅蹤影，霸戲哥覺得佢演技自然，外形討好，就只欠一個令人印象深刻嘅角色。
期待周祉君喺《一樣的天空》有突破性演出。
霸戲哥
** 博客文章文責自負,不代表本公司立場 **
古今中外電影界，久唔久就會有啲所謂嘅「小道消息」，同傳媒放風話邊套電影拍續集，又話搵咗邊個開戲，實情係十劃都未有一撇。霸戲哥深信，當中一定有啲「警轟」，諸如刺激下股價呀，呃下知名度咁。
呢啲小道消息，霸戲哥好少放喺心度，唯獨今次例外。因為盛傳霸戲哥偶像Nicholas Cage有機會演出新系列《驚天奪寶》，仲要係由Jerry Bruckheimer口中講嘅，似乎堅堅哋。
話說Jerry Bruckheimer早兩日喺Reddit宣傳佢套《壯志凌雲：獨行俠》嗰陣，喺AMA（ask me anything）環節被問到嚟緊會唔會搵番Nic Cage合作，Jerry就爆響口話同對方合作寫緊《驚天奪寶》嘅script。如果係真嘅話，就真係驚天新聞啦。
霸戲哥諗番起當年都好興呢啲奪寶動作戲，好似《盜墓迷城》呀、《盜墓者羅拉》咁，但霸戲哥始終對《驚天奪寶》情有獨鍾，除咗因為Nic Cage對尋寶嘅執着同狂熱，好符合佢原本嘅性格之外，當年女主角Diane Kruger真係索到癲咗，就算隔咗幾年拍第二集都係咁正。
所以如果真係有Nic Cage拍新系列，都一定要搵埋Diane Kruger呀。
