霸戲哥之日常#231 │ 徙置區

今集《尋人記II》主題圍繞徙置區，霸戲哥睇完好大感觸。方東昇同佢嘅團隊，唔單止尋獲40年前受訪嘅兩位女士，仲搵番失落已久嘅舊街坊人情味。若然冇咗呢班舊街坊、社區中心同熱心市民嘅幫助，相信方東昇就算有三頭六臂，都未必尋人成功。

霸戲哥比較好彩，冇經歷過住徙置區日子，但身邊都有唔少朋友住過，亦聽過唔少辛酸史。聽得最多係衞生環境極之惡劣（一層六十四單位，共享六個公廁），其次就係治安問題。女仔肯定最慘，沖涼又怕畀鹹濕佬昅，屎急又唔太想去解決。

徙置區源於1953年嘅石硤尾大火，令幾萬家庭痛失家園，港英政府就喺附近興建徙置大廈安置災民，成為咗徙置居嘅原型。第一型徙置大廈係「工」字型，一個單位120平方呎，規定要住夠五個人，如果一家唔夠五人，點都要硬攝其他家庭湊夠數，依家梗係覺得唔人道啦，但當時有瓦遮頭，其實已經好好。

香港人就係咁犀利，喺咁惡劣嘅居住環境，都可以咬緊牙關捱過，深信明天會更好。所以，今日住劏房嘅，都唔好灰心，只要有一口氣，人生就會有希望。

霸戲哥

** 博客文章文責自負,不代表本公司立場 **

無意中喺 Netflix睇到個遊戲節目叫《不熔有失》（Floor is Lava）， 一睇幾乎睇到唔捨得熄機。霸戲哥真係有眼不識泰山，呢個號稱最受歡迎遊戲節目，早喺2020年已經推出，而第二季亦即將喺今個星期五上架。

遊戲極之簡單，每集設有一個主題關卡，一team三人嘅參賽者，要通過重重障礙，一時要飛檐走壁，一時要引體上升，目標係要避免跌落溶岩而抵達出口，咁就可以拎到可觀獎金。簡單講，成個遊戲考驗參賽者嘅膽色、智力、體力，同埋最重要嘅合作性。如果身邊有個豬隊友，保證會「陀衰家」。

節目嘅setting超班，參賽者嘅反應同表情更加係世界級。睇住佢哋臨門一腳跌落熔岩嘅慘樣，有時真係忍唔住要幸災樂禍。

睇《不熔有失》，令霸戲哥諗番起以前《閃電傳真機》嘅遊戲環節「一石二鳥三蟲四duck」。細細個真係好恨報名，可惜最終因為怕畀同學仔笑而放棄。呢度有冇人參加過可以分享吓？

快啲到禮拜五，我要一口氣煲晒第二季。