霸戲哥之日常#234 │ 飛機奇片

好耐冇睇過一齣咁爽嘅印度奇片，霸戲哥真係要瞓身推介。片名《RRR》，唔係朗拿度呀、Rosanne嗰啲，3R係Rise、Roar同Revolt，係講革命嘅，依家喺Netflix熱播。Roar~

霸戲哥無意捲進印度同英國嘅殖民紛爭，但睇戲就知，印度人應該好憎英國佬，將佢哋妖魔化成畜牲都不如。呢齣好明顯係印度主旋律飛機片，但who cares?

故事背景設喺印度獨立之前，英國總督強行擄走貢德族女孩瑪莉，獵人畢姆死命營救，中途認識警員阿蘭，又因兩人神功蓋世，建立一段可歌可泣嘅bromance⋯⋯

喂劇情唔重要啦好冇，反正觀眾睇得爽就得。唔好畀三粒鐘片長嚇親，成齣戲由頭爽到尾，要動作有動作，要感人有感人，要靚女有靚女（又係 Alia Bhatt），要歌舞有歌舞。總之一切都盡在導演嘅掌握中。

觀眾睇呢類爽片，亦唔使計較力學同邏輯，成個甄子丹咁款嘅阿蘭，打到腳跛血盡，嗌幾聲又滿血；貌似沙拿嘅畢姆，唔止係不死身，仲識召喚百獸攻擊，狗扯到不行但我buy！最爆笑係嗰啲煞有介事嘅慢鏡同定鏡，除咗營造爽感，對劇情推進係完全無幫助嘅。

霸戲哥同豬視妹睇到眼球都飛埋出嚟，呢三粒鐘，爽呀！

霸戲哥

** 博客文章文責自負,不代表本公司立場 **

霸戲哥係港島人，入屯門嘅次數就已經唔多，至於再入嘅下白泥，人生就只去過一次咁大把。最記得事前先book定酒店（嘉湖海逸好似係），直情當正去程trip咁大陣仗。

偶然去轉下白泥睇日落梗係浪漫，但如果你日日對住個泥灘、彈塗魚同招潮蟹，又係咪真係咁過癮？

今晚呢集《尋人記II》，方東昇決定搜尋90年代喺下白泥讀村校嘅一班小豆丁，當年佢哋通山走天生天養，平日落田種菜，閒時捉蝦釣魚為樂，書本知識唔多，但夾竹桃有冇毒，黃蜂蜜蜂點分，肯定考佢哋唔到。

村校係舊時代產物，多建於窮鄉僻壤，教育資源唔多，但的確令好多鄉村細路有得讀書嘅機會。90年代開始，新界新市鎮迅速發展，鄉村亦逐漸走向都市化，村校慢慢被淘汰。加上出生率下降，適齡學童年年滅少，好多村校都難逃殺校命運。

方東昇今次搵番嘅呢班豆丁，今日都已經四十出頭做晒父母。問佢哋有得揀，會唔會畀下一代讀村校，雖然各有爭辯，但答案其實都心中有數。

喺香港，求學始終都係求分數。呢個呃唔到人嘅。