霸戲哥之日常#237 │ 薪火相傳

謠傳話TVB同芒果TV合力炮製《聲生不息》嚟捧紅炎明熹，呢刻霸戲哥真係有少少信。今晚炎明熹唱完容祖兒首《心淡》，佢嘅表演片段、相片、改圖、meme，充斥住社交平台，呢種震撼似乎好耐都冇見過。

《心淡》係2003年作品，徐繼宗作曲、Gary Tong編曲、Wyman填詞，係首慘到無可再慘嘅失戀歌，試問有咩慘得過「來回地獄又折返人間」? 當年嘅大熱K歌，十居其九都係情歌，而失戀歌亦佔據一個好重要位置。呢個絕對係商業計算，因為好多人失戀會約friend唱K嘛。

炎明熹係2005年出世，換句話講，《心淡》其實仲年長過佢。比自己仲要老嘅歌，正常都會有啲娘同過氣，但《心淡》唔單止冇，炎明熹唱呢個版本仲「活化」咗首歌，呢個正正係令廣東歌得以延續，甚至推向更廣同更年輕嘅受眾。

當然炎明熹都算幾幸運，剛出道就集萬千寵愛，佢獻唱《心淡》之前，本尊容祖兒仲特登同佢視像親授心得。

千禧後嘅香港樂壇，容祖兒幾乎獨領風騷，但後來有一段日子，廣東歌氣勢不及K-Pop，亦冇乜女歌星能夠撐起樂壇。炎明熹嘅冒起，能唔能夠成為下一位紅遍亞洲嘅天后，就要睇佢嘅後天努力同際遇嘞。

霸戲哥

** 博客文章文責自負,不代表本公司立場 **

問下大家，你哋食辛辣杯麵嗰陣，會唔會飲埋入面啲湯？霸戲哥唔食得辣，但對住明知係味精粉沖出嚟嘅湯，都係毫無抵抗力地飲個佢杯底朝天。

連杯麵嘅湯都咁講究，你就知韓國人對湯嘅要求有幾嚴格。如果中國人食飯，最緊要雙筷子，咁韓國人就一定係隻匙羹。韓國人係無湯不歡，大部份料理都以湯做主打，「湯之國」係當之無愧。

據講，韓國湯品嘅種類分得好廣，大致可分為guk、tang、jjigae同jeongol四大類，如果要細分，就肯定超過100種！

Netflix依家就有套關於韓國湯之文化嘅節目《湯之國》上架，節目會介紹各種唔同種類嘅湯品，好似有濟洲島聞名嘅海鮮湯，又有大邱嘅牛骨湯，睇完包你食指大動。

至於點解韓國人咁重視湯品文化？原來韓國以前因為成日戰亂，普遍百姓都好窮，為咗可以平均分配食物，家家戶戶都習慣煲一大煲湯，保證人人有份。呢種一家人嘅感覺，就流傳後世到依家，成為韓國嘅傳統文化。

冇咩事，我隊埋個辛辣杯麵先。