霸戲哥之日常#238 │ 遊戲節目

啱啱呢個週末真係充實，因為第二季《不熔有失》喺Netflix上架啦，又可以喺電視機前同班參賽者一齊大叫「Floor is LAVA~~~~~~~~~~」。

第二季雖然得五集，唔係好夠喉，但關卡嘅難度同創意度又提升唔少，所以比起第一季更刺激。今次玩法大同小異，一句講晒就係咪跌落熔岩啦，但身手好唔係大晒，冇作戰策略，或者橫衝直撞嘅，肯定只有死路一條。至於參賽者就算成功密室逃脫，都唔可以慶祝住，因為仲要同另一隊成績較好嘅參賽者作終極之戰——鬥快登上滑潺潺嘅火山口。勝出嗰隊先可以拎走一萬美金同埋最高榮譽「熔岩燈」！

霸戲哥模糊嘅記憶之中，喺八十年代尾TVB有個大整蠱遊戲節目，係一次性但好大陣仗嘅，一班藝員獲邀上去玩，好似要答問題定擲骰仔，跟住要走過一啲設計過但密封嘅箱，箱入面有時有忌廉，有時有昆蟲，記憶中班藝員嘅表情都係世界級。如果有讀者記得，不妨留言分享。

個人認為TVB其實都可以製作呢類遊戲節目，執行上應該唔算太難，一來可以令藝員有更高曝光率，二來又可以帶畀觀眾娛樂，三來仲可以call sponsor，嗰啲咩防跣鞋、防水產品實肯落廣告。

係差在唔知個「岩漿」點溝出嚟啫！

霸戲哥

** 博客文章文責自負,不代表本公司立場 **

謠傳話TVB同芒果TV合力炮製《聲生不息》嚟捧紅炎明熹，呢刻霸戲哥真係有少少信。今晚炎明熹唱完容祖兒首《心淡》，佢嘅表演片段、相片、改圖、meme，充斥住社交平台，呢種震撼似乎好耐都冇見過。

《心淡》係2003年作品，徐繼宗作曲、Gary Tong編曲、Wyman填詞，係首慘到無可再慘嘅失戀歌，試問有咩慘得過「來回地獄又折返人間」? 當年嘅大熱K歌，十居其九都係情歌，而失戀歌亦佔據一個好重要位置。呢個絕對係商業計算，因為好多人失戀會約friend唱K嘛。

炎明熹係2005年出世，換句話講，《心淡》其實仲年長過佢。比自己仲要老嘅歌，正常都會有啲娘同過氣，但《心淡》唔單止冇，炎明熹唱呢個版本仲「活化」咗首歌，呢個正正係令廣東歌得以延續，甚至推向更廣同更年輕嘅受眾。

當然炎明熹都算幾幸運，剛出道就集萬千寵愛，佢獻唱《心淡》之前，本尊容祖兒仲特登同佢視像親授心得。

千禧後嘅香港樂壇，容祖兒幾乎獨領風騷，但後來有一段日子，廣東歌氣勢不及K-Pop，亦冇乜女歌星能夠撐起樂壇。炎明熹嘅冒起，能唔能夠成為下一位紅遍亞洲嘅天后，就要睇佢嘅後天努力同際遇嘞。