霸戲哥之日常#242 │ 華強北

信不信由你，霸戲哥呢世人從未踏足過深圳半步（經過唔算），所以對號稱「中國電子第一街」嘅華強北入面嘅事蹟，一直都當係傳說咁聽。我只係知，喺炒IPhone嘅全盛時期，華強北個「回收價」比先達高水，造就車手來回羅湖走水貨。

呢個名字帶點江湖味嘅華強北，亦係手機零件集散地，入面嘅人個個臥虎藏龍，唔使幾分鐘就能將一部手機零件拆散再重組。亦因為咁，任何失蹤或失竊嘅手機，都極有機會end up喺呢度，華強北就好比「世界手機的盡頭」。

喺華強北入面，見證住窮人發跡嘅經過，亦記載好多艱苦奮鬥嘅故事。國內最近就有套戲《奇蹟笨小孩》，由《少年的你》嘅易烊千璽主演，講述年輕人靠重組手機零件致富嘅奇蹟故事，地點就係設定喺華強北。

戲名雖然叫《奇蹟笨小孩》，但易烊千璽一啲都唔笨，除咗精通電子儀器，個人膽色、耐力、魅力同執行力都遠高於常人，發跡絕對唔係奇蹟。

《奇蹟笨小孩》好多地方都經過商業計算，最後埋單收10億人民幣，都算係意料之內。套戲亦有好多發人深省嘅地方，尤其再次印證「仗義每當屠狗輩」呢個定理。大家有時間可以去Netflix睇下。

霸戲哥

** 博客文章文責自負,不代表本公司立場 **

呢生人買飛入場睇得最多嘅戲，肯定係《鐵達尼號》。我發誓並唔係為咗睇Kate Winslet粒⋯⋯海洋之心，亦當然唔會為咗睇Leonardo DiCaprio啦。講你都唔信，霸戲哥居然係想聽《My Heart Will Go On》，後來索性買咗隻電影soundtrack返屋企日聽夜聽，搞到老媽子一度懷疑我鬼上身。

直至有一日，霸戲哥終於頂唔順Celine Dion不停消費呢首歌，把心一塊將CD送埋畀人，首歌嘅魔咒先至解除。但依家每提起Celine Dion，都會想打冷震。當然，呢個只係霸戲哥問題，因為Celine Dion貴為樂壇天后，無論佢唱幾多次《My Heart Will Go On》，全球fans依舊會起哄。

不過對於Celine Dion嘅認識，說來慚愧，霸戲哥真係唔太知。而以Celine Dion嘅生平為藍本嘅電影《聲夢戀歌》，後日就會上映，故事會講述主角「艾蓮」由被發掘到成名，再成為三子之母嘅經歷。當然，觀眾梗係會再喺戲院度聽到佢嘅首本名曲啦。

我又打冷震啦喂。