霸戲哥之日常#239 │ 七人樂隊

大家仲記唔記得有齣電影叫《七人樂隊》（前名《八部半》？即係雲集七位頂級導演洪金寶、許鞍華、譚家明、袁和平、林嶺東、徐克同杜琪峯聯手執導嗰齣呢，套戲跑完地球一圈（參加不同電影節），今年7月28日，終於返番嚟原產地——香港上映。

電影用咗個好優雅嘅英文名Septet，即七重奏嘅意思，七位大師級導演一人拍一段分別代表不同年段嘅小故事，串起嚟就見證咗一個大時代嘅轉變。過往都有唔少呢類嘅「幾節棍電影」，好似2007年嘅《鐵三角》、2008年嘅《十分鍾情》同2016年嘅《Good Take》咁，由於唔同導演有唔同嘅個人風格同表現手法，所以觀影感覺寧舍特別。但如果講到導演團隊嘅名氣，就肯定冇得同《七人樂隊》比。

霸戲哥睇咗《七人樂隊》預告，感覺都似係硬銷香港情懷嘅戲，電影公司安排喺香港回歸25周年嘅7月上映，唔知係無心插柳定刻意嘞。令人傷感嘅係，林嶺東導演已不在人世，而呢部戲亦係佢嘅遺作。

唔知《七人樂隊》會唔會好似七重奏咁，留下餘音裊裊？下月自有分曉。

霸戲哥

** 博客文章文責自負,不代表本公司立場 **

啱啱呢個週末真係充實，因為第二季《不熔有失》喺Netflix上架啦，又可以喺電視機前同班參賽者一齊大叫「Floor is LAVA~~~~~~~~~~」。

第二季雖然得五集，唔係好夠喉，但關卡嘅難度同創意度又提升唔少，所以比起第一季更刺激。今次玩法大同小異，一句講晒就係咪跌落熔岩啦，但身手好唔係大晒，冇作戰策略，或者橫衝直撞嘅，肯定只有死路一條。至於參賽者就算成功密室逃脫，都唔可以慶祝住，因為仲要同另一隊成績較好嘅參賽者作終極之戰——鬥快登上滑潺潺嘅火山口。勝出嗰隊先可以拎走一萬美金同埋最高榮譽「熔岩燈」！

霸戲哥模糊嘅記憶之中，喺八十年代尾TVB有個大整蠱遊戲節目，係一次性但好大陣仗嘅，一班藝員獲邀上去玩，好似要答問題定擲骰仔，跟住要走過一啲設計過但密封嘅箱，箱入面有時有忌廉，有時有昆蟲，記憶中班藝員嘅表情都係世界級。如果有讀者記得，不妨留言分享。

個人認為TVB其實都可以製作呢類遊戲節目，執行上應該唔算太難，一來可以令藝員有更高曝光率，二來又可以帶畀觀眾娛樂，三來仲可以call sponsor，嗰啲咩防跣鞋、防水產品實肯落廣告。

係差在唔知個「岩漿」點溝出嚟啫！