霸戲哥之日常#246｜ 不枉此生

一個人成唔成功，絕對唔係淨係睇佢係咪呼風喚雨，定着得身光頸靚，更加唔係自己把口說了算。噚晚方東昇喺《尋人記II》「尋回」嘅93歲胡婆婆，就肯定係成功嘅人辦。

生於二戰之前，一個女仔能接受教育，喺陶秀女子中學讀書；經歷過日本侵華嘅戰亂，到後來幫洋人打工，練得滿口流利英語；同老公恩愛大半世紀，合力養大四個仔女。最難得嘅係，30年後胡婆婆再次受訪，依然頭腦清晰對答如流。正是方東昇話齋——「上天攞走佢嘅視力，但攞唔走佢嘅人生閱歷」。

胡婆婆自認讀書唔叻，又話細個成日出貓，但佢嘅人生，先至係一張亮麗嘅成績表。由佢講出「不枉此生」，相信唔會有幾多人有異議。

霸戲哥

** 博客文章文責自負,不代表本公司立場 **

Marvel嘅《復仇者聯盟4:終局之戰》同《蜘蛛俠決戰千里》上映之後，MCU嘅Phase 3正式完結。
嚟到Phase 4，梗係唔可以照辦煮碗消費番原有嘅超級英雄，而Marvel嘅營銷策略就係，不斷將漫畫角色帶入MCU，堆砌出更大嘅宇宙。

就算你唔係Marvel粉絲，只要無意中睇咗一兩齣MCU電影或劇集，又無意中鍾意咗佢哋，就會無意中墮入咗Marvel嘅世界。

《Ｍs. Marvel》就係其中一套引人上釣嘅劇集，第一集前日喺Disney+上架。利申，霸戲哥同豬視妹都唔Marvel鐵粉，第一集比我哋嘅感覺係不過不失，無想像中咁沉悶，但亦無想像中嘅驚喜。第一集標題「Why世代」，主要係講主角Kamala（Iman Vellani飾）嘅高校生活，身為巴基斯坦裔嘅佢，成日發白日夢，又鍾意超級英雄，本身喺學校已經係異類，唔太受歡迎。不過Kamala最難捱嗰part，原來係同父母相處，呢類世代之爭本身就好易有共鳴。

相信未來會融入更多關於宗教、種族嘅訊息。 咁就上中下三路盡吸天下觀眾。