霸戲哥之日常#245｜ 超級學校英雄

Marvel嘅《復仇者聯盟4:終局之戰》同《蜘蛛俠決戰千里》上映之後，MCU嘅Phase 3正式完結。
嚟到Phase 4，梗係唔可以照辦煮碗消費番原有嘅超級英雄，而Marvel嘅營銷策略就係，不斷將漫畫角色帶入MCU，堆砌出更大嘅宇宙。

就算你唔係Marvel粉絲，只要無意中睇咗一兩齣MCU電影或劇集，又無意中鍾意咗佢哋，就會無意中墮入咗Marvel嘅世界。

《Ｍs. Marvel》就係其中一套引人上釣嘅劇集，第一集前日喺Disney+上架。利申，霸戲哥同豬視妹都唔Marvel鐵粉，第一集比我哋嘅感覺係不過不失，無想像中咁沉悶，但亦無想像中嘅驚喜。第一集標題「Why世代」，主要係講主角Kamala（Iman Vellani飾）嘅高校生活，身為巴基斯坦裔嘅佢，成日發白日夢，又鍾意超級英雄，本身喺學校已經係異類，唔太受歡迎。不過Kamala最難捱嗰part，原來係同父母相處，呢類世代之爭本身就好易有共鳴。

相信未來會融入更多關於宗教、種族嘅訊息。 咁就上中下三路盡吸天下觀眾。

霸戲哥

** 博客文章文責自負,不代表本公司立場 **

TVB嘅音樂節目《聲夢傳奇》捧紅咗炎明熹，嚟緊《聲夢傳奇2》梗係更加揼本，一個唔覺意捧多個「炎明熹2.0」出嚟就乜都翻本。或者吸取過芒果TV合製《聲生不息》嘅經驗，《聲夢2》更加注重視覺效果，誓要搣甩《流行經典50年》嗰陣娘味。

霸戲哥成日強調，音樂節目最重要未必係歌唱者本身，反正嚟得參賽嘅，斷估實力都唔會太參差。反而舞台效果成為咗節目觀賞價值嘅dominant factor，有好嘅視覺享受，就會留得住觀眾。

聽聞今次《聲夢2》台前幕後動員超過300人，製作組採用咗由五個升降台組成嘅電腦編碼活動升降舞台，簡單講，即係五個舞台可自由升高降低，製造出不同組合嘅舞台配搭。另外又透過多部camera，採用多角度拍攝，就可以營造到嶄新嘅舞台感，令觀眾好似睇緊演唱會嘅feel。

《聲夢2》今個禮拜六夜晚8點半就喺翡翠台播出，到時就知個舞台係咪真係咁堅。