霸戲哥之日常#244｜ 舞台大Upgrade

TVB嘅音樂節目《聲夢傳奇》捧紅咗炎明熹，嚟緊《聲夢傳奇2》梗係更加揼本，一個唔覺意捧多個「炎明熹2.0」出嚟就乜都翻本。或者吸取過芒果TV合製《聲生不息》嘅經驗，《聲夢2》更加注重視覺效果，誓要搣甩《流行經典50年》嗰陣娘味。

霸戲哥成日強調，音樂節目最重要未必係歌唱者本身，反正嚟得參賽嘅，斷估實力都唔會太參差。反而舞台效果成為咗節目觀賞價值嘅dominant factor，有好嘅視覺享受，就會留得住觀眾。

聽聞今次《聲夢2》台前幕後動員超過300人，製作組採用咗由五個升降台組成嘅電腦編碼活動升降舞台，簡單講，即係五個舞台可自由升高降低，製造出不同組合嘅舞台配搭。另外又透過多部camera，採用多角度拍攝，就可以營造到嶄新嘅舞台感，令觀眾好似睇緊演唱會嘅feel。

《聲夢2》今個禮拜六夜晚8點半就喺翡翠台播出，到時就知個舞台係咪真係咁堅。

霸戲哥

** 博客文章文責自負,不代表本公司立場 **

記得之前寫過Johnny Depp同Amber Heard嘅世紀官司好睇過戲，點會估到Discovery頻道肥水不留別人田，真係將佢變成紀錄片《Johnny vs Amber》，仲將佢斬開成兩集喺唔同日子播出，儼如亞視嘅《解剖外星人》一樣吊大家癊。

呢單世紀審訊，最終由Johnny Depp勝訴，撇甩「家暴男」惡名，而Amber慘成大輸家，聲名狼藉，嚟緊仲諗住打女權牌密謀上訴，但「明眼人」都知勝算唔高囉。

據知《Johnny vs Amber》除咗訪問法律團隊、親友同證人之外，盛傳兩位當事人都以錄影同錄音方式講番自己嘅版本，好有《18年後的終極告白2.0》feel啫。霸戲哥就比較關心呈堂嘅證物，諸如兩人喺庭上互揭嘅臭「屎」，以及Johnny Depp隻斷指，如果統統收錄喺紀錄片入面，會唔會18+呢？

仲有就係，紀錄片嘅收益又會點瓜分呢？如果呢條橋work，Amber索性叠埋心水上訴，再組團拍多次《Johnny vs Amber 2.0》，將家醜一次過外傳，分分鐘殺出一條米路噃。