霸戲哥之日常#243 │ 賣家醜

記得之前寫過Johnny Depp同Amber Heard嘅世紀官司好睇過戲，點會估到Discovery頻道肥水不留別人田，真係將佢變成紀錄片《Johnny vs Amber》，仲將佢斬開成兩集喺唔同日子播出，儼如亞視嘅《解剖外星人》一樣吊大家癊。

呢單世紀審訊，最終由Johnny Depp勝訴，撇甩「家暴男」惡名，而Amber慘成大輸家，聲名狼藉，嚟緊仲諗住打女權牌密謀上訴，但「明眼人」都知勝算唔高囉。

據知《Johnny vs Amber》除咗訪問法律團隊、親友同證人之外，盛傳兩位當事人都以錄影同錄音方式講番自己嘅版本，好有《18年後的終極告白2.0》feel啫。霸戲哥就比較關心呈堂嘅證物，諸如兩人喺庭上互揭嘅臭「屎」，以及Johnny Depp隻斷指，如果統統收錄喺紀錄片入面，會唔會18+呢？

仲有就係，紀錄片嘅收益又會點瓜分呢？如果呢條橋work，Amber索性叠埋心水上訴，再組團拍多次《Johnny vs Amber 2.0》，將家醜一次過外傳，分分鐘殺出一條米路噃。

霸戲哥

** 博客文章文責自負,不代表本公司立場 **

信不信由你，霸戲哥呢世人從未踏足過深圳半步（經過唔算），所以對號稱「中國電子第一街」嘅華強北入面嘅事蹟，一直都當係傳說咁聽。我只係知，喺炒IPhone嘅全盛時期，華強北個「回收價」比先達高水，造就車手來回羅湖走水貨。

呢個名字帶點江湖味嘅華強北，亦係手機零件集散地，入面嘅人個個臥虎藏龍，唔使幾分鐘就能將一部手機零件拆散再重組。亦因為咁，任何失蹤或失竊嘅手機，都極有機會end up喺呢度，華強北就好比「世界手機的盡頭」。

喺華強北入面，見證住窮人發跡嘅經過，亦記載好多艱苦奮鬥嘅故事。國內最近就有套戲《奇蹟笨小孩》，由《少年的你》嘅易烊千璽主演，講述年輕人靠重組手機零件致富嘅奇蹟故事，地點就係設定喺華強北。

戲名雖然叫《奇蹟笨小孩》，但易烊千璽一啲都唔笨，除咗精通電子儀器，個人膽色、耐力、魅力同執行力都遠高於常人，發跡絕對唔係奇蹟。

《奇蹟笨小孩》好多地方都經過商業計算，最後埋單收10億人民幣，都算係意料之內。套戲亦有好多發人深省嘅地方，尤其再次印證「仗義每當屠狗輩」呢個定理。大家有時間可以去Netflix睇下。