《都市日報》新老闆入主後動作多多，最近有猛將加盟，請咗
Miranda Chan加盟做 COO，佢做過《蘋果日報》和《星島日報》高層，在銷售和管理方面都好有經驗，《都市》搵咗佢實在得一強助。
《都市》新老闆黃浩仲對媒體話，想投資工廈物業做公司總部，又想自建印刷廠，用5 億至6 億元去投資金額不輕，務須小心審慎咁話。
《都市》新老闆一入場就話用5、6億自己起廠，都幾有雄心壯志，行內人話「像真度」比《晨報》更大，關鍵係《都市》已亮出幕後水喉，《晨報》雖然傳6月16日創刊，但仲唔知邊個出水。《巴士日報》早前報道過阿水哥郭炳湘有意投資《都市》，而水哥的發言人亦不否認，咁講可以話變相證實咗《都市》的幕後支持者。有咗水哥呢枝超級水喉照住，唔好話5、6億啦，10、20億都濕濕碎啦，邊個夠膽質疑水哥支持的報紙無水。
雖然時至今日，仲有人懷疑點解呢啲超級富豪要加入辦報呢個夕陽行列，小鯊就話大家真係唔明白財主的心態咯，佢地大把錢，好多嘢都做得到，但偏偏係見傳媒講嘢未必啱聽，佢地又改變唔到，十分無能為力，到某年某月某日有人叫佢地辦報，佢地會覺得「Why not?」起碼有個發聲園地，講自己喜歡講的話，唔使假手於人，所以就有咁多人入場啦。
小鯊
小鯊
** 博客文章文責自負,不代表本公司立場 **
在一個飯局中，有財經猛人吹水吹到肥佬黎的「契弟論」。事緣商台老總陳志雲新年前訪問肥老黎，佢話壹傳媒被「抽廣告」，一年唔見咗兩億元。志雲大師追問肥老黎如果有人出高價收購《蘋果日報》和《壹周刊》，佢會唔會賣?肥老黎回答，賣的話，一定會被子孫話佢係「契弟」一名。所以多多錢，佢都唔賣。
財經猛人唔係好信肥老黎的說話，認為契弟唔怕做，只怕溢價唔夠高啫。
大家傾起，肥老黎講「契弟論」其實唔係第一次，佢去年六月接受商台訪問時，講到《爽報》會唔會「執或者賣」的時候，佢話「唔需要執」，又話「我賣（指旗下刊物），正契弟」。結果《爽報》執笠，當時就有員工鬧佢「唔賣，但執笠，仲衰過契弟。」
席間又提到過去壹傳媒也講過不會賣台灣蘋果。例如2012年4月10日，香港蘋果老總張劍虹在「沙膽虹手記」回應台灣壹傳媒賣盤消息時話：「五億美金就想肥佬黎放棄2300萬華人的台灣市場？太便宜了吧！」結果同年10月，台灣壹傳媒宣布決以5.8億美元出售所有媒體業務，其中約51%股權售仲係賣俾親大陸的「旺旺蔡」。但最後有關交易被台灣政府以反壟斷法理由終止，令肥老黎想賣都賣唔到。
財經猛人手下有幾隻上市公司，睇數好精，佢話傳聞有富豪接觸過肥佬黎，佢信喎。但接觸唔等如傾得成，成唔成唔係講度氣，主要睇價錢啫。
佢話壹傳媒而家市值得21億元，你俾30億至40億元要成個集團買走，肥佬黎梗係唔做「契弟」啦，媒體有溢價，此前單係壹傳媒台灣業務都賣到45億港紙啦，點會同一個價俾你買晒香港和台灣蘋果? 但如果俾到70、80億又如何，真係永世不賣，攬住過世? 假設只睇生意，搞番好啲成個集團賺3億，13倍PE都係值40億，如果有人出到80億，即係俾咗40億溢價，都好大手筆啦，出錢出得多，由量變就會到質變，肥佬黎真係唔動心？ 所以問題係有無人出得起天價囉。
結論係，肥老黎賣唔賣，始終係睇個價靚唔靚仔，同做唔做契弟無關係囉。
