做契弟，要有溢價!

在一個飯局中，有財經猛人吹水吹到肥佬黎的「契弟論」。事緣商台老總陳志雲新年前訪問肥老黎，佢話壹傳媒被「抽廣告」，一年唔見咗兩億元。志雲大師追問肥老黎如果有人出高價收購《蘋果日報》和《壹周刊》，佢會唔會賣?肥老黎回答，賣的話，一定會被子孫話佢係「契弟」一名。所以多多錢，佢都唔賣。

財經猛人唔係好信肥老黎的說話，認為契弟唔怕做，只怕溢價唔夠高啫。

大家傾起，肥老黎講「契弟論」其實唔係第一次，佢去年六月接受商台訪問時，講到《爽報》會唔會「執或者賣」的時候，佢話「唔需要執」，又話「我賣（指旗下刊物），正契弟」。結果《爽報》執笠，當時就有員工鬧佢「唔賣，但執笠，仲衰過契弟。」

席間又提到過去壹傳媒也講過不會賣台灣蘋果。例如2012年4月10日，香港蘋果老總張劍虹在「沙膽虹手記」回應台灣壹傳媒賣盤消息時話：「五億美金就想肥佬黎放棄2300萬華人的台灣市場？太便宜了吧！」結果同年10月，台灣壹傳媒宣布決以5.8億美元出售所有媒體業務，其中約51%股權售仲係賣俾親大陸的「旺旺蔡」。但最後有關交易被台灣政府以反壟斷法理由終止，令肥老黎想賣都賣唔到。

財經猛人手下有幾隻上市公司，睇數好精，佢話傳聞有富豪接觸過肥佬黎，佢信喎。但接觸唔等如傾得成，成唔成唔係講度氣，主要睇價錢啫。

佢話壹傳媒而家市值得21億元，你俾30億至40億元要成個集團買走，肥佬黎梗係唔做「契弟」啦，媒體有溢價，此前單係壹傳媒台灣業務都賣到45億港紙啦，點會同一個價俾你買晒香港和台灣蘋果? 但如果俾到70、80億又如何，真係永世不賣，攬住過世? 假設只睇生意，搞番好啲成個集團賺3億，13倍PE都係值40億，如果有人出到80億，即係俾咗40億溢價，都好大手筆啦，出錢出得多，由量變就會到質變，肥佬黎真係唔動心？ 所以問題係有無人出得起天價囉。

結論係，肥老黎賣唔賣，始終係睇個價靚唔靚仔，同做唔做契弟無關係囉。

小鯊

** 博客文章文責自負,不代表本公司立場 **

特首「跑馬仔」未正式開始，一班「疑似」候選人已摩拳擦掌，但原來除了他們，不同界別人士亦開始積極「備戰」。

熱馬之一、政務司司長林鄭月娥做主席的扶貧委員會，剛推出「築福香港」運動，早前被踢爆其中一個合作伙伴竟是有線電視。消息一出，惹來林鄭與有線關係密切的猜測。

本來做吓這些傳媒夥伴沒有什麼大不了。但林鄭與有線關係良好，似乎非第一天的事。林鄭上任不足三個月，已接受有線專訪，形象強硬「好打得」的她，更罕有地在鏡頭前落淚︰「如果我都跳船，係對唔住香港市民。」仲話將個人誠信和公信力押到今屆政府上。

事隔一年多，林鄭去年底再接受有線訪問，大談政改諮詢，更承認政府有認受危機、管治困難，更說2017 年若未能普選，擔心往後管治會再惡化。翻查記錄，林鄭亦曾接受無綫《講清講楚》訪問兩次，但引發的震撼遠遠不及有線呢兩次，關鍵係在訪問中講什麼。林鄭絕不輕易接受電視台專訪，但短短年多內接受有線訪問兩次，而且每次有咁「爆」的soundbite，難免令人有啲聯想噃。

有線老細九倉主席吳光正，雖然即將上市公司交棒俾個仔去管，但素來關心政治。前年他高調支持唐英年參選特首，可惜最終因「填錯」身分證號碼，提名被判無效，當時已有聲音指吳光正睇到大勢，「明飲糖水、暗食涼粉」，否則都唔會咁容易填錯。

下屆特首選舉即將開跑，有線和林鄭行得咁埋，無理由唔通知一聲老細，唔通吳主席咁快又想在「高民望、好打得」的林鄭身上落少少注？