林鄭有線眉來眼去有玄機?

特首「跑馬仔」未正式開始，一班「疑似」候選人已摩拳擦掌，但原來除了他們，不同界別人士亦開始積極「備戰」。

熱馬之一、政務司司長林鄭月娥做主席的扶貧委員會，剛推出「築福香港」運動，早前被踢爆其中一個合作伙伴竟是有線電視。消息一出，惹來林鄭與有線關係密切的猜測。

本來做吓這些傳媒夥伴沒有什麼大不了。但林鄭與有線關係良好，似乎非第一天的事。林鄭上任不足三個月，已接受有線專訪，形象強硬「好打得」的她，更罕有地在鏡頭前落淚︰「如果我都跳船，係對唔住香港市民。」仲話將個人誠信和公信力押到今屆政府上。

事隔一年多，林鄭去年底再接受有線訪問，大談政改諮詢，更承認政府有認受危機、管治困難，更說2017 年若未能普選，擔心往後管治會再惡化。翻查記錄，林鄭亦曾接受無綫《講清講楚》訪問兩次，但引發的震撼遠遠不及有線呢兩次，關鍵係在訪問中講什麼。林鄭絕不輕易接受電視台專訪，但短短年多內接受有線訪問兩次，而且每次有咁「爆」的soundbite，難免令人有啲聯想噃。

有線老細九倉主席吳光正，雖然即將上市公司交棒俾個仔去管，但素來關心政治。前年他高調支持唐英年參選特首，可惜最終因「填錯」身分證號碼，提名被判無效，當時已有聲音指吳光正睇到大勢，「明飲糖水、暗食涼粉」，否則都唔會咁容易填錯。

下屆特首選舉即將開跑，有線和林鄭行得咁埋，無理由唔通知一聲老細，唔通吳主席咁快又想在「高民望、好打得」的林鄭身上落少少注？

小鯊

** 博客文章文責自負,不代表本公司立場 **

今朝晨咁早，小鯊就收到銀行高層嘅短訊，射過來《蘋果日報》老總張劍虹嘅一篇文章。文章題為「Nielsen忽略了電子平台」，沙膽虹在文中大讚《蘋果日報》的網上版好得，提議AC Nielsen統計讀者人數要計埋電子平台。但當中亦透露了至去年9月之前的12個月期間，《蘋果日報》報紙的讀者人數只有94.1萬，全港排名第三，排第一係《頭條日報》。(AC Nielsen是以抽樣上門調查的方式，統計香港報章的讀者人數。)

http://goo.gl/AA5pfN

後來問銀行高層做乜晨咁早傳段嘢過來，佢話按記憶，《蘋果日報》1997年高峰時出紙50萬份，讀者人數去到180萬人，即使按Nielsen的統計都有160萬人，但今日睇《蘋果》報頭印住出紙17.8萬份，唔知實銷多少，讀者人數得番94萬，按比例計，發行量跌幅比例大過讀者人數的跌幅，睇嚟讀者人數仍會繼續跌。

 

銀行高層就懷疑，佢地睇100萬人是一個重大關口，若受眾連100萬人都未到，仲可唔可以稱得上「大眾化」傳媒呢？唔止報紙，電視都係，無記周末某些黃金時段節目的收視率亦只有16點或以下，觀眾人數亦係唔夠100萬人，同樣唔夠太眾化。佢話好多銀行服務，例如信用卡、稅貸等，同快速消費商品差唔多，對象都係針對大眾，如果媒體唔夠大眾化，又值唔值咁貴廣告費呢？

近排沙膽虹係咁自爆《蘋果日報》銷量和讀者人數下插。行家睇見都嘖嘖稱奇，究竟應該佩服他們夠坦白呢？抑或驚訝他們咁早就自我放棄收費報紙呢？