今朝晨咁早，小鯊就收到銀行高層嘅短訊，射過來《蘋果日報》老總張劍虹嘅一篇文章。文章題為「Nielsen忽略了電子平台」，沙膽虹在文中大讚《蘋果日報》的網上版好得，提議AC Nielsen統計讀者人數要計埋電子平台。但當中亦透露了至去年9月之前的12個月期間，《蘋果日報》報紙的讀者人數只有94.1萬，全港排名第三，排第一係《頭條日報》。(AC Nielsen是以抽樣上門調查的方式，統計香港報章的讀者人數。)
http://goo.gl/AA5pfN
後來問銀行高層做乜晨咁早傳段嘢過來，佢話按記憶，《蘋果日報》1997年高峰時出紙50萬份，讀者人數去到180萬人，即使按Nielsen的統計都有160萬人，但今日睇《蘋果》報頭印住出紙17.8萬份，唔知實銷多少，讀者人數得番94萬，按比例計，發行量跌幅比例大過讀者人數的跌幅，睇嚟讀者人數仍會繼續跌。
銀行高層就懷疑，佢地睇100萬人是一個重大關口，若受眾連100萬人都未到，仲可唔可以稱得上「大眾化」傳媒呢？唔止報紙，電視都係，無記周末某些黃金時段節目的收視率亦只有16點或以下，觀眾人數亦係唔夠100萬人，同樣唔夠太眾化。佢話好多銀行服務，例如信用卡、稅貸等，同快速消費商品差唔多，對象都係針對大眾，如果媒體唔夠大眾化，又值唔值咁貴廣告費呢？
近排沙膽虹係咁自爆《蘋果日報》銷量和讀者人數下插。行家睇見都嘖嘖稱奇，究竟應該佩服他們夠坦白呢？抑或驚訝他們咁早就自我放棄收費報紙呢？
小鯊
** 博客文章文責自負,不代表本公司立場 **
踏入新一年，傳媒新聞多籮籮，今次都唔係咩異動，係要恭喜有線新聞的馮德雄，2014有個好兆頭，升咗做副總裁(新聞)，呂雲生亦都升做助理新聞總監。
人稱「大馮」的馮德雄在中文大學新聞系畢業，在傳媒界縱橫三十年，先後在商台、亞視、無綫、明報及有線任職。至於另外一位升職嘅係做緊總編輯主任的呂雲生，阿呂同樣在亞視做過，仲係當年六君子事件的主角之一。
今次二人齊齊升職後，口痕友就好奇，傳聞新聞部話事人趙應春份合約今年年底到期，今次的安排會唔會有接班的意味呢，不過，亦有口痕友笑言阿春退休的傳聞幾乎年年聽架啦。
總之，同事就當然希望大馮同阿呂齊齊萬歲萬歲啦，大家新年Happy吓，聞說新一年升職的有線新聞部中人都唔少，又係，話晒有線新聞台做得有聲有色，近排仲不時獨家專訪高官，記得大前年，國教事件時，政務司司長林鄭月娥流下眼淚的獨家訪問，行家仲記憶猶新，最近林鄭接受有線訪問時又承認管治困難認受不足，引起政壇議論。
隨著傳媒競爭愈來愈激烈，睇怕升職加薪後都要加埋「辛」囉。
