博客文章
八十年代專演奸角嘅資深演員沈威，今日傳出死訊，終年71歲。
同豬視妹傾開，先知沈威原來係佢成長時期嘅噩夢，凡有佢演出嘅戲，豬視妹都唔太夠膽睇。或者佢腦海lock住咗沈威喺《義蓋雲天》入面虐待王祖賢嘅畫面啩。
霸戲哥印象最深，當然係沈威喺《省港旗兵》入面飾演出賣班大圈仔嘅阿泰啦。有人話沈威喺架車度畀火燒嗰幕，係導演麥當雄出蠱惑呃佢拍嘅，佢事前完全唔知麥當雄癲到真係搵火燒，所以喺戲入面七情上面都係出於自然反應。盛傳沈威good take完即刻衝去立刀追斬麥當雄，都唔知真定假。
一個演員能夠令觀眾咁怕佢，絕對係非常成功。只可惜八十年代嘅奸角，好似大傻成奎安、大咪何家駒、基哥李兆基咁，都先後離開人世，只能夠喺電影中重溫佢哋嘅風采。
霸戲哥
** 博客文章文責自負,不代表本公司立場 **
因為MJ，霸戲哥自細就超鍾意打籃球，但礙於生得矮，打極都去唔到滿意嘅水平。讀完U之後基本上都冇乜點掂過個籃波。
打得唔叻就放棄，說穿了，就係我根本未夠熱愛籃球。
最近Netflix就有套關於籃球嘅電影《籃兒當搏盡》（戲名娘到喊）。講述Adam Sandler飾演嘅球探Stan，夢想成為NBA教練，可惜一路都畀人當係二打六，撈極都撈唔掂。直至佢喺西班牙街場見到Bo（Juancho Hernangómez飾），被對方嘅球技震懾，決心將佢訓練成NBA球星，當然中途遇到好多挫敗啦。好一個籃球版《少林足球》嘅橋。
電影行公式化嘅套路，預咗冇乜大驚喜，但當你見到Stan同Bo各算追尋夢想而付出血汗，讀書時嗰陣熱血當堂返番晒嚟。戲入面亦有數之不盡嘅NBA球星，現役同過氣嘅都有，NBA迷一定睇到好high。
仲諗住落街轉身射個三分波，點知遇着黃雨。算啦，都係下次先。
